Tot a estru

Marcabru

A la fontana del vergier, A l'alena del vent doussa Al departir del brau tempier, Al prim comens de l'ivernaill Al son desviat, chantaire, Amics Marchabrun, car digam Ans que·l terminis verdei Assatz m’es bel el temps essuig: Auias de chan com enans’e meillura Bel m’es can s’esclarzis l’onda Bel m’es cant son li frug madur Bel m’es qan li rana chanta Bel m’es quan la fueill’altana Bel m'es quan la fuelh' ufana Cortesamen vuoill comensar D’aiso laus Dieu Dirai vos e mon latin Dirai vos senes duptansa Dire vos vuoill ses doptanssa Doas cuidas ai compaignier Emperaire, per mi mezeis, Emperaire, per vostre prez En abriu, s'esclairo·il riu contra·l Pascor, Estornel, cueill ta volada; Ges l’estornels no·n s’ublida Hueymais dey esser alegrans L’autrier, a l’issuda d’abriu, Lan qan cor la doussa bisa, Lanquan fuelhon li boscatge L'autrier jost' una sebissa L'iverns vai e·l temps s'aizina Lo vers comens quan vei del fau Lo vers comenssa Mantengutz e Jois eisamens, Pax in nomine Domini! Pax in nomine Domini! Per savi·l tenc ses doptanssa Pois l’inverns d’ogan es anatz Puois la fuoilla revirola Pus la fuelha revirola Pus mos coratges s'es clarzitz Pus per un cosselh descrec Pus s’enfulleysson li verjan, Quan l'aura doussana bufa, Seigner n'Audric, Soudadier, per cui es jovens Tot a estru

L'autrier jost'una sebissa
Trobei pastora mestissa,
De joi e de sen massissa,
Si cum filla de vilana,
Cap'e gonel'e pelissa
Vest e camiza treslissa
Sotlars e causas de lana.

Toza, fi·m ieu, res faitissa,
Dol ai car lo freitz vos fissa.
--Seigner, so·m dis la vilana,
Merce Dieu e ma noirissa,
Pauc m'o pretz si·l vens m'erissa,
Qu'alegreta sui e sana.

-- toza, fi·m ieu, cauza pia,
Destors me sui de la via
Per far a vos compaignia!
Quar aitals toza vilana
No deu ses pareill paria
Pastorgar tanta bestia
En aital terra, soldana.

--Don, fetz ela, qui que·m sia,
Ben conosc sen e folia!
La vostra pareillaria,
Seigner, so·m dis la vilana,
Lai on se tang si s'estia,
Que tals la cuid'en bailia
Tener, no·n a mas l'ufana.

-- toza de gentil afaire,
Cavaliers fon vostre paire
Que·us engenret en la maire,
Car fon corteza vilana.
Con plus vos gart, m'etz belaire,
E per vostre joi m'esclaire,
Si·m fossetz un pauc humana

--Don, tot mon ling e mon aire
Vei revertir e retraire
Al vezoig et a l'araire,
Seigner, so·m dis la vilana!
Mas tals se fai cavalgaire
C'atrestal deuria faire
Los seis jorns de la setmana.

--Toza, fi·m ieu, gentils fada,
Vos adastret, quam fos nada,
D'una beutat esmerada
Sobre tot'autra vilana!
E seria·us ben doblada,
Si·m vezi'una vegada,
Sobira e vos sotrana.

--Seigner, tan m'avetz lauzada,
Que tota·n sui enojada!
Pois en pretz m'avetz levada,
Seigner, so·m dis la vilana,
Per so n'auretz per soudada
Al partir : bada, fols, bada,
E la muz'a meliana.

--Toz', estraing cor e salvatge
Adomesg'om per uzatge.
Ben conosc al trespassatge
Qu'ab aital toza vilana
Pot hom far ric compaignatge
Ab amistat de coratge,
Si l'us l'autre non engana.

-- don, hom coitatz de follatge
Jur'e pliu e promet gatge:
Si·m fariatz homenatge,
Seigner, so·m dis la vilana!
Mas ieu, per un pauc d'intratge,
Non vuoil ges mon piucellatge,
Camjar per nom de putana.

-- toza, tota creatura
Revertis a sa natura:
Pareillar pareilladura
Devem, ieu e vos, vilana,
A l'abric lonc la pastura,
Car plus n'estaretz segura
Per far la cauza doussana.

--Don, oc! mas segon dreitura
Cerca fols sa follatura,
Cortes cortez'aventura,
E·il vilans ab la vilana!
En tal loc fai sens fraitura
On hom non garda mezura,
So ditz la gens anciana.

--Toza, de vostra figura
Non vi autra plus tafura
Ni de son cor plus trefana.

--Don, lo cavecs vos ahura,
Que tals bad'en la peintura
Qu'autre n'espera la mana.

Gies no gard a la pintura
Cel c'en espera la mana.

Source: http://www.cam.org/~malcova/troubadours/