Una doussa res benestan,
Belha e prezan,
Gaia e complida de totz bes,
Miralhs e flors
De dompnas e jois d'amadors
Mi saup panar
Tot mon cor ab sos belhs plazers,
Quar sembla vers
Tot so que dis, senes gabar!
Et ieu pres mais un belh mot ab ver dir
Que mil plazers lai on om vol mentir.

Si tot al cor m'es trop pezan
Pel belh semblan
Amoros ab que m'a conques,
E ma folors
No sai si s'er mals o doussors,
Ni sai que far,
Pus que tan grans es sos poders
Que·l sieus vezers
Fa·ls amoros oltracujar
Ab sos plazers, don m'a dat tal cossir,
Quar tot lo mon pot de plazer complir.

E pus qu'es de valor tan gran,
No·m sia dan
Si del grieu mal li quier merces
Que·m don'Amors
Per lieis que passa las gensors
Ab gen parlar
Et ab lauzor et ab valers,
Quar lunhs avers
No m'aonda·l sieu pretz lauzar!
E de senhor conquier om son albir
Qui·l sap amar e lauzar e grazir.

Si·l plai, senes trestot enjan,
Vuelh que s'en an
Al bon rei dels Aragones,
Quar sa valors
Es tals que·ls sieus bos aips melhors
Pot om comtar
Cum las estelas, quant es sers,
E son aders
Per lui ben servir mout joglar,
Que res als sieus noi sabon avenir
Mas quan dizon: pros reis es, ses falhir.

A Na Maria de Ventadorn vai dir,
Chansoneta, qu'ieu sui al sieu servir