Bel semblan
M'auran
Lonjamen
Donat dan
Pezan,
Que·ill turmen
M'ausiran
Pensan.
Donx, valen
Cors prezan,
No m'an
Tan volven

Vostre clar vis
E la fresca color
E·l bel dous ris,
Per que m'ausi Amor.
Que paradis
No volgr'aver meillor
Sol que m'aizis
Ab vos sotz cobertor.

Ar dic folia,
Quar tan m'enans!
Donx, si·us plazia
Qu'ieu fos amans,
Complitz auria
Totz mos talans!
Donx, dous'amia,
No·m sia dans

S'ieu ai dit
Outracuidamen,
Quar languit
Ai tan malamen,
Per que·us crit
Merce umilmen:
C'un petit
De bel chauzimen

Acsetz de mi!
Que pos anc vi
Vostre bel cors dous e plazen,
No m'en parti,
Ans vos servi
De bon coratge leialmen.
Donx si m'ausi
Amors aisi
Per vos, ja no·us estara gen,
C'anc no·m parti
Ni non gurpi
De far vostre comandamen.

Servida
E grazida
·Us ai totas sazos,
Complida
E chauzida,
La genser c'anc fos.
Ma vida
Es fenida,
Si no·m faitz joios,
Delida
E perida
E no per razos.

Ans er pecatz,
Si m'ausizetz,
Qu'eu crei blasmatz
N'er vostre pretz!
E donx veiatz
Co·m destrenhetz,
Dona, si·us platz,
Ni co·m tenetz

Pres
E conques
Qu'ieu no·m puesc aillor rendre.
Ges
Grans merces
No vol en vos deisendre.
Fes
Mi valgues
Que per dar e per vendre
S'es
Mos cors mes
En far e en atendre

Tot se que·us plaia
Ni·us er bo!
Si tot m'esglaia
La greus preizo,
Voluntatz gaia
M'en somo,
Que que·m n'eschaia
C'a vos me do.

E si·m fauc ieu totz volontos
Ab fin cor gai et amoros,
Car trop vueill mai morir per vos
Que de nuill'autra poderos.

Al bon rei castela, N'Anfos,
Coman mon cors, don', apres vos.