Los grieus dezirs que·m solon far doler
Ai oblidatz, dompna ric'e valens,
Qu'enaissi m'es camjatz lo cors e·l sens
Que res no vuelh mas sol vostre voler,
E·ls mals d'amor que·m solon far languir
Pres de la mort, quant ieu amav'alhor,
Mi fai semblar ab joi plazen doussor,
Si quo·l solelhs fai la neu devenir
Aiga doussa, tant es dous sos resplandres.

Tot atresi com re no pot valer
Fuecs ni clartatz ni estela luzens
Contra·l solelh, m'es autres jois niens
Contra·l vostre, qu'el mon non puesc vezer
Neguna res, lai on pus m'o cossir,
Que de beutat, de pretz ni de valor
Ni de bos faitz, que·s tanhan a ricor,
Que sol apres de vos puesca venir
De la gran mar tro lai on cor Menandres.

Belhs Diamans devetz be nom aver,
Qu'aissi cum es bels dias resplandens
Clartatz del mon, dompn', etz vos onramens
D'autras dompnas, don deu om retener
Vostres rics faitz de vezer e d'auzir!
Et atressi cum en un mirador
Vezon li uelh manta belha color,
Pot om en vos tot autre ben chausir,
Per que·m plai mout lo lauzars e l'espandres.

E vos, dompna, avetz tant de saber
E valetz tant que ben etz conoissens
Que lai on plus val beutatz e jovens,
Don valon mais li do e li plazer!
E tug li pros, que·s volon far grazir,
Fan lurs belhs dos lai on pus an sabor!
E breus respos es loncs jois en amor,
Per que dompna non deu son joi fenir,
Cum fes Elis, la comtessa de Flandres.

Mas vos avetz en mi tan de poder
Que mil tans pus me seria plazens
Mort a sufrir que fos de ren jauzens
Qu'a vos fos grieus, si sabia per ver
Que tot lo mon agues al mieu servir!
Qu'ab vostres digz belhs e de gran onor
Avetz mon cor mes en tan gran ricor
Que bos pessars m'es, on pus vos dezir,
Jois e repaus e sojorns e remandres.

Tezaur e gaug e dompna e senhor
Fas tot de vos e lais los mals d'alhor,
Qu'anc non ac pus de son bel conquerir
Jois ni plazers Sesars ni Alissandres.