Ges, per malvastat qu'er veya
Dels ricx cuy valors non agensa,
No·m ven en cor qu'ieu·m recreya
De joy ni de belha parvensa,
Sitot lur es valors amara
Tan que quecx la dezampara
Per desconoyssensa.

De re mos cors no s'esfreya
Mas quar so nom camget Proensa,
Que falhi tan que·s desleya!
Per qu'ueymais aura nom Falhensa,
Quar leyal senhori'e cara
A camjada per avara
Don pert sa valensa.

Be volri'agues enveya
Lo reys qu'ab Frances mogues tensa,
Qu'el vens e pren e pesseya
Turcx, qui Frances non an guirensa!
E qui lurs vensedors vens ara,
Semblan es, qui ben o guara,
Que·ls vencutz leu vensa.

S'eras lo reys non desreya
D'Aragon, trop fai d'estinensa,
E·l coms cui Tolzans s'autreya,
Qu'ueymais non an pus revinensa!
Quar si l'us l'autre non ampara,
Major saut penran encara
Frances, ses temensa.

A que ja non er peleya
Ni de lun om non es s'entensa
Qu'us fassa ren que far deya,
Tan torna pretz en nonchalensa
Quar qui pren anta en sa cara,
Si no·s venj'o no s'esclara,
Trop fai de sufrensa.

En Guillen de Moncad'ampara
Pretz, on mans ricx s'en despara,
Don fai gran valensa.

N'Esquilheta, son bon pretz gara
N'Esclarmonda fin'e cara
Per qu'als pros agensa.