Un sonet fatz malvatz e bo

Guiraut de Bornelh

A be chantar A be chantar A l'onor Deu torn en mo chan, A penas sai comensar Ab semblan me fai dechazer Ailas, com mor·quez as, amis - Aital chansoneta plana Alegrar me volgr' en chantan Amars, onrars e charteners, Amors, Ans que venha·l nous fruchs tendres Aquest terminis clars e gens, Ar auziretz Be conve, pos ja baissa·l ram Be deu en bona cort dir Be deu om chastian dire Be for'oimais drechs el tems gen, Be me plairia, senh'en reis, Be m'era beus chantars Be vei e conosc e sai, Ben es drechs, pos en aital port Can brancha·l brondels e rama Can creis la frescha folh'e·l rams Can la brun'aura s'eslucha Can lo glatz e·l frechs e la neus Car non ai Cardalhac, per un sirventes Chans en brolh ni flors en verjan De bels digz menutz frays De chantar De chantar ab deport En un chantar, Era, can vei reverdezitz Era, si·m fos en grat tengut, Era.m platz, Giraut de Bornelh, Er'ai gran joi que.m remembra l'amor Gen m'aten Ges aissi del tot no·m lais Ges de sobrevoler no·m tolh Ja·m vai revenen Jois e chans Jois sia comensamens La flors del verjan L'altrer, lo primer jorn d'aost, Leu chansonet'e vil Lo dolz chans d'un auzel, Los aplechs, M'amia·m men'estra lei. Mas, com m'ave, Deus m'aiut, Mot era dous e plazens No posc sofrir c'a la dolor No.m platz chans de rossinhol, No·s pot sofrir ma lenga qu'ilh no dia Nulha res a chantar no·m falh, Obs m'agra, si m'o consentis Per solatz revelhar, Planc e sospir Qui chantar sol Razon e loc Reis glorios, verais lums e clartatz, S'anc jorn agui joi ni solatz, S'era no poia mos chans, S'es chantars ben entendutz Ses valer de pascor Si ja d'Amor Si per mo Sobre-Totz no fos, Si sotils sens Si·l cor no·m ministr'a drech Si·m plagues tan chans Si·m sentis fizels amics, Si·us quer conselh, bel'ami'Alamanda, Sol c'Amors me plevis Solatz, jois e chantar Tals gen prezich'e sermona Tot gen m'estav'e suau et en patz Tot suavet e de pas Totztems me sol plus jois plazer Un sonet fatz malvatz e bo

No posc sofrir c'a la dolor
De la den la lenga no vir
E·l cor ab la novela flor,
Lancan vei los ramels florir
E·lh chan son pel boschatge
Dels auzeletz enamoratz,
E si tot m'estauc apensatz
Ni pres per malauratge,
Can vei chans e vergers e pratz,
Eu renovel e m'assolatz.

Qu'eu no m'esfortz d'altre labor
Mas de chantar e d'esjauzir!
C'una noch somnav'en pascor
Tal somnhe que·m fetz esbaudir
D'un esparver ramatge
Que m'era sus el ponh pauzatz
E si·m semblav'adomesgatz,
Anc no vi tan salvatge,
Mas pois fo maners e privatz
E de bos getz apreizonatz.

Lo somnhe comtei mo senhor,
C'a son amic lo deu om dir,
E narret lo·m tot en amor
E dis me que no·m pot falhir
Que d'oltra mo paratge
No m'aia tal ami'en patz,
Can m'en serai pro trebalhatz,
C'anc om de mo linhatge
Ni d'oltra ma valor assatz
Non amet tal ni·n fon amatz.

Era n'ai vergonh'e paor
E·m n'esvelh e·n planh e·n sospir
E·l somnhe tenh a gran folor
E no cut posch'endevenir!
Pero d'un fat coratge
No pot partir us rics pensatz
Orgolhos e desmezuratz
C'apres nostre passatge
Sai que·l somnhes sera vertatz
Aissi drech com me fo narratz.

E pois auziretz chantador
E chansos anar e venir
Qu'era, can re no sai m'assor,
Me volh un pauc plus enardir
D'enviar mo messatge
Que·ns porte nostras amistatz.
Que sai n'es facha la meitatz,
Mas de leis no n'ai gatge
E ja no cut si'achabatz
Nuls afars, tro qu'es comensatz.

Qu'eu ai vist acomensar tor
D'una sola peir'al bastir
E cada pauc levar alsor
Tan josca c'om la poc garnir.
Per qu'eu tenh vassalatge
D'aitan, si m'o aconselhatz,
E·l vers, pos er ben assonatz,
Trametrai el viatge,
Si trop qui lai lo·m guit viatz
Ab que·s deport e·s do solatz.

E s'eu ja vas emperador
Ni vas rei vauc, si·m vol grazir
Tot aissi com al seu trachor
Que no·l sap ni no·l pot gandir
Ni mantener, ostatge
Me lonh en us estranhs renhatz
Cais si serai justiziatz
E fis de gran damnatge,
Si·l seus gens cors blancs e prezatz
M'es estranhs ni m'estai iratz.

E vos entendetz e veiatz
Que sabetz mo lengatge,
S'anc fis motz cobertz ni serratz,
S'era no·ls fatz ben esclairatz.

E sui m'en per so esforsatz
Qu'entendatz cals chansos eu fatz.

Source: http://www.cam.org/~malcova/troubadours/