Gen fora, contra l'afan
Qe m'a dat d'una dompn'Amors,
Puois ab lieis non trob mas dan,
Qe·m fezes d'autra part socors,
Ab que s'aleuges ma dolors:
Qe·il dir de non desplazen
De lieis, on plus non enten,
M'an ostat
E virat
Lo cor e·l sen
D'un greu fais,
Per q'ieu lais
L'entendemen...

Tant qant la preguei chantan,
No·m fo lo prejars mas follors,
Per qe·m vir deserenan
Lo prec e·l cor e·l chan aillors,
Vas tal on beutatz e valors
Son, e tuich bon faich valen!
E s'il de cor m'i cossen
Ni m'es dat
De bon grat
Ab ferm coven,
Ges oimais
No m'irais
Ni m'espaven.

E pero li beill semblan
E·il gent acuillir e·il doussors
Del sieu bel cors nou, prezan,
E·ill beutatz, e·il fresca colors,
Q'es sobre totas autras flors,
La·m fant amar tant temen
C'anc no·i l'ausei far parven
Mon pensat
Acordat,
Ni·l fin talen
Don m'atrais,
Mos cors gais --
Gran ardimen

Ardimen m'atrais trop gran,
Mas doptei q'en sia clamors
Quan la bella·m soferc tan --
Q'enqer sent las doussas sabors,
Qe de greu malananssa·m sors --
Qan li baisiei doussamen
Son bel, blanc col covinen,
Ab honrat
Dous comjat,
Privadamen!
Adoncs frais
Lo doutz bais
Mon marrimen

Tant son siei faich benestan
Que tot l'als c'om ve es errors
Mantenen q'om l'es denan!
E vei los bes e las honors,
E·ls plazers chascun jorn majors!
E·l sieus doutz esgar rizen
Qe·m fetz amorosamen
M'ant loingnat
De foudat,
Per q'ieu li·m ren --
Don mi nais,
Al cor, jais
Qe·m ten gauzen.

Ses prec, ses dich e ses man,
C'anc no·ill fis, tant m'es grans paors,
Li autrei mon cor e mon chan
Per retraire sas grans lauzors --
E car val sobre las meillors,
Aja·n, s'il platz, chausimen
Tal qe·m don, suau e gen,
Un emblat
Don prezat
De bel prezen,
Contra·ls brais
Dels savais,
Celadamen.

Pros Vescomtess'ab cors gen,
A Ventadorn vos presen
Mon comjat
Acordat --
Chantar plazen
Q'es oimais
Tornatz gais
Onradamen.