Ben vuelh que sapchon li pluzor
D'un vers, si·s de bona color
Qu'ieu ai trag de mon obrador,
Qu'ieu port d'ayselh mestier la flor,
Et es vertatz,
E puesc en trair lo vers auctor,
Quant er lassatz.

Eu conosc ben sen e folor,
E conosc anta et henor,
Et ai ardiment e paor;
E si·m partetz un juec d'amor,
No suy tan fatz
No sapcha triar lo melhor
Entre·ls malvatz.

Eu conosc ben selh qui be·m di
E selh qui·m vol mal atressi
E conosc be selluy qui·m ri;
E si·ll pro s'azauton de mi,
Conosc assatz:
Qu'atressi dei voler lor fi
E lor solatz.

Ja ben aya selh qui·m noyri,
Que tan bo mestier m'eschari
Que anc a negu no·n falhi:
Que de jogar sobre coyssi,
A totz tocatz
Mais en say que nulh mo vezi,
Qual que·m vejatz.

Dieus en lau e sanh Jolia:
Tant ai apres del joc doussa
Que sobre totz n'ai bona ma,
E selh qui cosselh me querra
No l'er vedatz,
Ni us de mi non tornara
Descosselhatz.

Qu'ieu ai nom "maistre certa":
Ja m'amigu'anueg no m'aura
Que no·m vuelh'aver l'endema!
Qu'ieu suy d'aquest mestier, so·m va,
Tan ensenhatz
Que be·n sai gazanhar mon pa
En totz mercatz.

Pero no m'auzetz tan guabier
Qu'ieu non fos rahuzatz l'autrier,
Que jogav'a un joc grossier
Que·m fon trop bos el cap primier
Tro fo taulatz;
Quan gardiey, no m'ac plus mestier:
Si·m fon camjatz.

Mas elha·m dis un reprovier:
"Don, vostre datz son menudier"
"Et ieu revit vos a doblier,
Fis·m ieu: qui·m dava Monpeslier
Non er laissatz!"
E leviey un pauc son taulier
Ab ams mos bratz.

E quan l'aic levat lo taulier
Empeys los datz:
E·ill duy foron cairat vallier,
E·l terz plombatz.

E fi·l ben ferir al taulier,
E fon joguatz.