Farai un vers de dreit nien,
Non er de mi ni d'autra gen,
Non er d'amor ni de joven,
Ni de ren au,
Qu'enans fo trobatz en durmen
Sus un chivau.

No sai en qual hora·m fui natz,
No soi alegres ni iratz,
No soi estranhs ni soi privatz,
Ni no·n puesc au,
Qu'enaisi fui de nueitz fadatz
Sobr'un pueg au.

No sai cora·m fui endormitz,
Ni cora·m veill, s'om no m'o ditz!
Per pauc no m'es lo cor partitz
D'un dol corau,
E no m'o pretz una fromitz,
Per saint Marsau!

Malautz soi e cremi morir,
E re no sai mas quan n'aug dir.
Metge querrai al mieu albir,
E no·m sai cau:
Bos metges er si·m pot guerir,
Mas non, si·m mau.

Amigu'ai ieu, non sai qui s'es,
C'anc no la vi, si m'aiut fes,
Ni·m fes que·m plassa ni que·m pes,
Ni no m'en cau
C'anc non ac Norman ni Franses
Dins mon ostau.

Anc non la vi et am la fort,
Anc no·n aic dreit ni no·m fes tort;
Quan no la vei, be m'en deport,
No·m prez un jau,
Qu'ie·n sai gensor e belazor,
E que mai vau.

Fait ai lo vers, no sai de cui,
Et trametrai lo a celui
Que lo·m trameta per autrui,
Enves Peitau,
Que·m tramezes del sieu estui
La contraclau.