Lo plaing comenz iradamen
D'un vers don hai lo cor dolen!
Ir'e dolor e marrimen
Ai, car vei abaissar joven :
Malvestatz puej'e jois dissen
Despois muric lo peitavis.

Remazut son li prez e·ill lau
Qi solon issir de Peitau.
Ai com lo plagno li barrau.
Peza·m s'a longas sai estau.
Segner, lo baro q'ieu mentau
Metetz, si·us platz, em paradis

Del comte de peitieu mi plaing
Q'era de proeza compaing!
Despos pretz et donars soffraing,
Peza·m s'a lonjas sai remaing.
Segner, d'efern lo faitz estraing,
Qe molt per fon genta sa fis.

Glorios dieus, a vos me clam,
Car mi toletz aqels qu'ieu am!
Aissi com vos formetz adam,
Lo defendetz del fel liam
Del foc d'efern, qe non l'aflam,
Q'aqest segles nos escharnis.

Aqest segle teing per enic
Qe·l paubre non aten ni·l ric.
Ai com s'en van tuit mei amic,
E sai remanem tuit mendic.
Pero sai ben q'al ver afic
Seran li mal dels bos devis.

Gasco cortes, nominatiu,
Perdut avez lo segnoriu,
Fer vos deu esser et esqiu,
Don jovenz se clama chaitiu,
Qar un non troba on s'aiziu,
Mas qan n'anfos, q'a joi conquis.

Plagnen lo norman e franceis,
E deu lo be plagner lo reis
Cui el laisset la terr'e·l creis!
Pos aitan grans honors li creis,
Mal l'estara si non pareis
Chivauchan sobre serrazis.

Aqil n'an joja, cui que pes,
De limozi e d'engolmes!
Si el visques ni deu plagues,
El los agra dese conqes!
Estort en son car dieus lo pres,
E·l dols n'es intratz en aunis.

Lo plainz es de bona razo
Qe cercamonz tramet n'eblo.
Ai com lo plaigno li gasco,
Cil d'Espaign'e cil d'Arago.
Sant Jacme, membre·us del baro
Que denant vos jai pelegris.