Assatz es or'oimai q'eu chan!
Tant ai estat acondurmitz
C'anc mos chanz non fon lueing auzitz,
Mas era·m vau ja reveilhan,
Et irai mon joi recobran
Contre l'ivern e·l freig aurei.

De joi no·m cal fugir enan,
C'anc un sol jorn no·n fui garnitz,
Et es m'al cor prion sorzitz,
Si qu'entre gens vau sospiran
Lo dezirier c'ai d'amor gran,
Ni dorm ni veil, ni aug ni vei.

S'anc per amor anei velhan,
Ni·n fui anc fols ni trassailitz,
Ni cambiatz per chamjairitz,
Era·n lau dieu e saint joan,
C'ab tal amor vau amoran
C'anc non chamjec per autre mei.

Cesta non cug qe ja m'engan
S'ieu ja de leis no soi grazitz,
Ni no·n soi tant afolatitz
Que ja re'il qeira ni·l deman,
Petit ni pro, ni tan ni qan,
Ni mal ni be, ni so ni qei.

Tant la vei coinda e prezan,
E·l faigz de leis es tant eslitz
Qe sai me tenc per enreqitz
E lai serai en son coman
La nueh e·l jorn e·l mes e l'an,
C'aissi soi sieus com esser dei.

Plas es lo vers, vauc l'afinan
Ses mot vila, fals, apostitz,
E es totz enaissi bastitz
C'ap motz politz lo vau uzan,
E tot ades va·s meilluran
S'es qi be·l chant ni be·l desplei.