Ab lo temps qe fai refreschar
Lo segle els pratz reverdezir
Vueil un novel chant comenzar
D'un amor cui am e dezir!
Mas una s'es de mi loignada
Q'ieu non la puesc aconseguir,
Ni de mos digz no s'agrada.

Ja mai res no·m pot conortar,
Abanz mi laissarai morir,
Car m'an fag de mi donz sebrar
Lauzenjador, cui deus azir
Las tan l'aurai desirada
Que per lei plaing, plor e sospir,
E vau cum res enaurada.

Aqesta don m'auzetz chantar
Es plus bella q'ieu no sai dir!
Fresc'a color e bel esgar
Et es blancha ses brunezir!
Oc, e non es vernisada,
Ni om de leis non pot mal dir,
Tant es fin'et esmerada.

E sobre tota·s deu prezar
De dig ver, segon mon albir,
D'ensegnamen e de parlar,
C'anc non volc son amic trair!
Et ieu fols fui la vegada
Can crezei ren q'en auzis dir,
Ni·l fis so don fos irada.

Anc ieu de lei no·m volc clamar,
Q'enquer, si·s vol, me pot jauzir,
Et a ben poder de donar
D'aqo don me pot enrequir!
No posc far lonja durada,
Qe·l manjar en pert e·l durmir,
Car no m'es plus aizinada.

Amors es douza a l'intrar
Et amara al departir,
Q'en un jorn vos fara plorar,
Et autre jogar e burdir,
Q'eu sai d'amor enseigniada,
On plus la cujava servir,
Ilh s'es vas mi cambiada.

Messatges, vai, si deus ti guar,
E sapchas ab mi donz furmir,
Qu'eu non puesc lonjamen estar
De sai vius ni de lai guerir,
Si josta mi despoliada
Non la puesc baizar e tenir
Dins cambra encortinada.