Volontiers fera sirventes,

Bertran de Born

A totz dic qe ja mais non voil Ai Lemozis, francha terra cortesa, Al nou doutz termini blanc Anc no·s poc far maior anta Ar ven la coindeta sazos Ara sai eu de pretz quals l'a plus gran Be·m plai lo gais temps de pascor, Be·m platz car trega ni fis Belh m'es quan vey camjar lo senhoratge, Ben grans avoleza intra Can mi perpens ni m'arbire Casutz sui de mal en pena Dompna, puois de mi no·us cal D'un sirventes no·m cal far loignor ganda, Eu m'escondisc, dompna, que mal non mier Fuilhetas, ges autres vergiers Gent part nostre reis liouranda, Gerr'e trebailh vei et afan Ges de disnar non for'oimais maitis, Ges de far sirventes no·m tartz, Ges no me desconort, Ieu chan, que·l reys m'en a preguat Lo coms m'a mandat e mogut Mailolin, joglars malastruc, Mal o fai domna cant d'amar s'atarja. Miez sirventes vueilh far dels reis amdos, Molt m'es dissendre car col Mon chan fenis ab dol et ab maltraire Mout mi plai quan vey dolenta Non puosc mudar mon chantar non esparga, Nostre seingner somonis el mezeis Pero non hai ni seinhor ni vezi, Pois als baros enoia en lur pesa Pois lo gens terminis floritz Pois Ventedorns e Comborns ab Segur Qan la novella flors par el vergan Qan vei pels vergiers despleiar Rassa, mes si son primier Rassa, tant creis e mont'e poia S'abrils e fuoillas e flors Seigner en coms, a blasmar Sel qui camja bon per meillor, S'ieu fos aissi segner ni poderos Tortz e gerras e joi d'amor Un sirventes fatz dels malvatz barons, Un sirventes on motz non faill Volontiers fera sirventes,

Be·m plai lo gais temps de pascor,
Que fai fuoillas e flors venir!
E plai me qand auch la baudor
Dels auzels que fant retintir
Lo chant per lo boscatge!
E plai me qand vei per los pratz
Tendas e pavaillons fermatz!
Et ai grand alegratge
Qan vei per campaignas rengatz
Cavalliers e cavals armatz.

E platz mi qan li corredor
Fant las gens e l'aver fugir,
E platz me qan vei apres lor
Granren d'armatz corren venir,
E platz m'e mon coratge
Qan vei fortz chastels assetgatz
E·ls barris rotz et esfondratz,
E vei l'ost el ribatge
Q'es tot entorn claus de fossatz,
Ab lissas de fortz pals serratz.

Et atressi·m platz de seignor
Qand es primiers a l'envazir
En caval, armatz, ses temor,
C'aissi fai los sieus enardir
Ab valen vassalatge.
E pois qe l'estorns es mesclatz,
Chascus deu esser acesmatz
E segre·l d'agradatge,
Que nuills hom non es ren presatz
Tro q'a mains colps pres e donatz.

Massas e brans, elms de color,
Escutz traucar e desgarnir
Veirem a l'intrar de l'estor,
E maing vassal essems ferir,
Don anaran aratge
Cavail dels mortz e dels nafratz.
E qand er en l'estor intratz,
Chascus hom de paratge
Non pens mas d'asclar caps e bratz,
Car mais val mortz qe vius sobratz.

E·us dic qe tant no m'a sabor
Manjar ni beure ni dormir
Cum a qand auch cridar, a lor
D'ambas las partz, et auch bruir
Cavals voitz per l'ombratge,
Et auch cridar, aidatz aidatz
E vei cazer per los fossatz
Paucs e grans per l'erbatge,
E vei los mortz qe pels costatz
Ant los tronchos ab los cendatz.

Amor vol drut cavalgador,
Bon d'armas e larc de servir,
Gen parlan e gran donador
E tal qi sapcha far e dir
Fors e dinz son estatge
Segon lo poder qi l'es datz.
E sia d'avinen solatz,
Cortes e d'agradatge.
E domna c'ab aital drut jaz
Es monda de totz sos pechatz.

Pros comtessa, per la meillor
C'anc se mires ni mais se mir
Vos ten hom, e per la genssor
Dona del mon, segon c'auch dir.
Biatritz d'aut lignatge,
Bona dompn'en digz et en fatz,
Fonz lai on sorz tota bontatz,
Bella ses maestratge,
Vostre rics pretz es tant poiatz
Qe sobre totz es enanssatz.

Donzella d'aut linhage,
Tal en cui es tota beutatz,
Am fort, e sui per leis amatz!
E dona·m tal corage
Qe ja no pens esser sobratz
Per un dels plus outracujatz.

Baron, metetz en gatge
Castels e vilas e ciutatz
Enans c'usqecs no·us gerreiatz.

Papiol, d'agradatge
Ad Oc e No t'en vai viatz!
Digas qe trop estau en patz.

Source: http://www.cam.org/~malcova/troubadours/