Ara no vei luzir solelh,
Tan me son escurzit li rai!
E ges per aisso no·m esmai,
C'una clardatz me solelha
D'amor, qu'ins el cor me raya!
E, can autra gens s'esmaya,
Eu melhur enans que sordei,
Per que mos chans no sordeya.

Prat me semblon vert e vermelh
Aissi com el doutz tems de mai !
Si·m te fin'amors conhd'e gai :
Neus m'es flors blanch'e vermelha
Et iverns calenda maya,
Que·l genser e la plus gaya
M'a promes que s'amor m'autrei.
S'anquer no la·m desautreya

Paor mi fan malvatz cosselh,
Per que·l segles mor e dechai!
C'aras s'ajoston li savai
E l'us ab l'autre cosselha
Cossi fin'amors dechaya.
A malvaza gens savaya,
Qui vos ni vostre cosselh crei,
Domnideu perd'e descreya.

D'aquestz mi rancur e·m corelh
Qu'ira me fan, dol et esglai,
E pesa lor del joi qu'eu ai.
E pois chascus s'en corelha
De l'autrui joi ni s'esglaya,
Ja eu melhor dreih no·n aya,
C'ab sol deport venz'e guerrei
Cel que plus fort me guerreya.

Noih e jorn pes, cossir e velh,
Planh e sospir ! e pois m'apai.
On melhs m'estai, et eu peihz trai.
Mas us bos respeihz m'esvelha,
Don mos cossirers s'apaya.
Fols per que dic que mal traya
Car aitan rich'amor envei,
Pro n'ai de sola l'enveya

Ja ma domna no·s meravelh
Si·lh quer que·m do s'amor ni·m bai
Contra la foudat qu'eu retrai,
Fara i genta meravelha
S'ilh ja m'acola ni·m baya.
Deus s'er ja c'om me retraya
--A cal vos vi e cal vos vei --
Per benanansa que·m veya

Fin'Amor, ab vos m'aparelh!
Pero no·s cove ni s'eschai,
Mas car per vostra merce·us plai
--Deus cuit que m'o aparelha--
C'aitan fin'amors m'eschaya.
Ai, domna, per merce·us playa
C'ayatz de vostr'amic mercei,
Pus aitan gen vos merceya

Bernartz clama sidons mercei,
Vas cui tan gen se merceya.

E si eu en breu no la vei,
Non crei que lonjas la veya.