Peire Rotgier, a trassaillir
M'er per vos los digz e·ls covens
Qu'eu aic ab midonz, totz dolens,
De chantar, q'ie·m cuidiei soffrir;
E pois sai etz a mi vengutz
Cantarai, si n'ai estat mutz,
Que non vuoill remaner confes.

Mout vos dei lauzar e grazir
Car anc vos venc cors ni talens
De saber mos chaptenemens;
E vuoill qe·n sapchatz alqes dir.
E ja l'avers no·m si'escutz,
S'ieu sui avols ni recresutz,
Que pel ver non passetz ades.

Car qui per aver vol mentir,
Aquel lauzars es blasmamens
E tortz e mals enseignamens,
E fai·n als autres escarnir.
Q'en dich non es bos pretz saubutz
Mas el faich es puois conogutz,
E pels faitz veno·il dich apres.

Per me voletz mon nom auzir.
Cals son -- o drutz... er clau las dens
C'ades poja mos pessamens
On plus de prion m'o conssir
Ben vuoill sapchatz que non sui drutz
Tot per so c'ar non sui volgutz;
Mas ben am, sol midonz m'ames

Peire Rotgier, cum puosc sofrir
Qez eu am aissi solamens
Meravill me si viu de vens
Tortz er si·m fai midonz morir
S'ieu muor per liei farai vertutz
Per qu'eu cre que si fos perdutz
Dreitz fora que puois mi nogues.

Era·il ven en cor que m'azir,
Mas ja fo q'er'autres sos sens
C'aitals es sos entendemens
Per q'ieu li dei totz temps servir
Pel ben qe·m n'es escazegutz;
Ja no m'en vengues mais salutz
Li dei totz temps estar als pes.

Si·m volgues sol tant consentir
Q'ieu fos totz temps sos entendens,
Ab bels digz n'estera jauzens,
E feira·m ses faitz esgauzir
E degra·m ben esser cregutz
Qu'eu non dic tan que·m fos creguz
Mas del bon respeig don visques.

Bon Respeig, d'aut sui bas cazutz
E si no·m ereb sa vertutz
Per conseil li don qe·m pendes