Donna, cel qe·us es bos amics,
A cui vos etz mals et enics,
Vos clama merce d'una re:
C'aujaz so qe·us vol dir per be
Aici en esta carta escrit,
Ez escoutaz com o a dit;
E prega·us qe non respondaz
Tro qe tot auzit o aiaz;
Qe tal ren i aura ben leu
Al fenir qe ja no·us er greu.
Donna, gran pena trauc per vos;
Anc mais non saubi mal qe·s fos.
Eu ai amat ben autra vez,
Ves altra part on era frez,
Leialmen e senes enjan;
Mas anc mais no trais tan d'afan.
Anc mais null'amors no·m toqet
Lai on la vostra ira·m intret,
Ni non isit de tan preon
Com aquesta, e no sai d'on.
Anc mais no saup qe·s fos amors
Ni no senti de sas dolors;
C'Amors m'a mes en tal destreich
Q'en granz chalors mi dona freich
Et ab granz freich mi dona chaut,
E·m fai irat s'anc mi fez baut.
Dos enemics ai trop mortals:
Vos et Amors, don qecs m'es mals.
Mas vos m'etz enemics de cor
Qi·m tollez ris, joi, e demor
E·m mostraz vostre mautalen,
E dizez me tot a presen;
Mas Amor no auch ni no vei
Ni no sai ves qal part s'estei:
Per q'eu non puos contendre a lui.
Mas greu m'es, car de mi no·s fui,
C'amar vos mi fai de tal guisa
On nostr'amor es mal devisa:
Qe·us am e vos no amaz mi;
Fort mal joc partit a aici.
Amors se demostra vilana,
Qi vos fai estar baud'e sana:
E vec qe nafrat m'a tan fort
Q'eu cuit aver trop peich de mort,
Car si sol a mort m'estorzia,
Ja tan fort no m'en plagneria:
Car qi tot tems viu a dolor,
Peiz a de mort, qi no·l secor.
S'Amors fos tan ben eseignada,
Se d'un pauc vos agues nafrada
-- sol neis de la milena part
Qe mi nafret en un esgart --
Ab aitan m'agra gen garit
D'aqel mal colp qe m'a ferit.
Ges la plaga non par defora,
Mas dinz lo cor m'art et acora;
E no m'en pot valer mezina,
Ses vos, ja tan no sera fina;
E s'eu per aicho recep mort
Vos ez Amors n'aurez lo tort,
Qe·m pograz sanar e garir.
Ja no·us en calgra Amor blandir --
Donna, non puosc ab toz contendre:
Vos pregar et Amor defendre;
Q'eu no vos pos ges far amar
S'Amor no m'en vol ajudar.
Pos vei qe mos precs no mi val,
Laserai m'en, -- si pogues al
Mas Amor no·m laissa garir,
Qi m'a mes en aquest conssir;
Qe d'autra part non aug ni veich
Mas vas la terra e vas l'endreich
On mais vos vei, mais n'ai de dol
Per lo grant gauch qe far mi sol.
Soven pens qe ja mais no·us veia,
E qe de loing ses vos m'esteia;
Qe qant eu vos vi de premier
Vos me disez ben a sobrier,
Ez on plus annei a ennan
Evos m'o annez pejuran;
Per q'eu tem s'eu mais vos vezia
Qez ades m'en pejuraria;
C'atresait me feiraz aucir
Ez eu enqer no voil morir;
Qar sol pel Bon Respeith voil viure
Non sai s'en fol mos dich vos liure,
Mas se vos me tenez per fol
D'aqo qe·us dic, enclin lo col.
Tot qan vos plaz m'es bon e bel.
Ja no·us farei autre revel.
Greu m'es qan mal no·us pos voler,
C'Amors no m'en dona poder;
Qe s'eu vos pogues voler mal
Nos fora alqes comunal;
D'aitan se no·m volcses amar
Qe·m pogra en altra part virar.
Mas d'aiqo sol non pos ja re
Car eu non ai poder de me:
D'aicho·m podez ben far orguoill
Er agradaz s'e·us am e·us voill;
Qe s'eu sabia tot en ver
Qe ja pro no·m volsez tener,
Ni en trastota vostra vida
Vostra amistaz no·m fos cobida,
Autra non poria amar ges
Per nulla beltat qez agues.
Si no·m volez estre amia,
Aizo no·m podez tolre mia
Q'eu toz temps no·us sia amics,
Sitot m'es vostre cor enics.
Donna, car en mos dich no·us lau
Ni vostra beltat no mentau
Eu o faz ben a escien,
Q'en re mais no cuit aver sen;
C'a mon grat vos cujariaz
Qe ja tan bella no fussaz;
Car per la beltat qez avez
Sai be qe plus vil me tenez.
Donna, maldit sion miraill
(e belleza, car no vos faill)
Donna, ja miraill no crezaz
Cujaz qe tan bella siaz
Com inz el miraill vos vezez
Ben ez folla si o crezez,
Qe tot mirail son menzonger,
E foson fraich toz li enter.
Donna, ceus qi·us lauzan en re,
Sapchaz qe non o fan per be:
C'aitan vos volon escharnir
Can vos lauzan ab lor mentir.
Mas eu no·us serai ja mentire,
Donna, c'ades vos voil ver dire;
M'en crezaz, donna, qe·us dic ver
-- ja negun non aia poder --
Car eu no vos lau ges per bella
Anz dic q'ez negra com niella.
Donna, vas totas parz predic
Qe plus ez laida q'eu non dic;
Mas a mi foraz asaz genta
C'aitals laida res m'atalenta
Donna, s'ieu volia dir
Tot aiqo q'eu de vos cossir,
No vos avria dich d'un an;
Mas eu tem no·m tornes a dan;
Per q'eu no·us en voil far lonc plait,
E dic vos be tot atresait,
Donna, se·l vostr'om pert en re
Sapchaz qe vos i perdez be.
Ben sabez qe vostre sui eu,
Ni non ai mais segnor soz Deu;
Per so sapchaz be tot de cert
Qe vos i perdez s'eu i pert.
Donna, del pauc tort q'eu vos ai
Ja sol no m'en razonarai,
E si n'auria asaz razos
Vos trobarez mas ochaisos.
Per jase mi podez durar;
Toz temps m'o podez contrastar,
Donna, car entre mi e vos
No voill plaides mais sol nos dos.
Qe ja nos partam d'est conten
Qe res mais non sap mon talen.
Ja non plaidejaz re per leich;
Per vos metessa·m prendez dreich;
Ez eu i cuit ben dir tal re
O non podez trobar mesbe.
A merce non podez rendir
C'ab aqo nos dei convertir.
Lai o neguna res non val,
Merces deu amortar lo mal.
Merces n'aiaz e chausimen
No vos i traich autre guiren,
Donna; merce vos qer, si·us plai
En mais guisas q'eu dir no sai
Aici·us qer merce e perdon,
Com Dieus perdonet al lairon.
Donna, s'eu recep mort per vos
Ja no vos sera negus pros.
Morai -- o eu com hom mespres
Qe de meiz morc estai en pes
Sospir mi fan fenir mon comde:
Ves vos mi lais vencut e domde
Plor mi tol q'eu non puos plus dire,
Mas cho q'eu volgra dir, conssire.
Donna, merce vos qer, si·us plaz;
Per merce qe merce n'aiaz
Merce vos clam, ma dolz amia,
Anz qe la Morz aissi m'aucia.