Ben s'eschai q'en bona cort
Chan qui chantar sap:
E ieu atendrai mon gap
Don mi tenrai plus per lort;
Car sabran li sec e·il sort
Q'ieu n'aurai pretz, qui q'en jap,
Dels vint qe serem el trap.

Donc l'endeman del beort
Levarai el cap
La gran corona de drap.
An Mita ab lo nas cort,
E qui l'apella dreich bort
Lau que la lenga l'arap
Que mais fols motz no·ill escap

Aissi ai bastit en gaug
Mon cor nou e fresc,
C'ades sort e saill e tresc
Si q'apenas veig ni aug;
E sapcha·l donz de Talaug
Q'ieu non sui cel que paresc:
Q'en autre sen m'entrebesc.

E qui·s vol, corn, crit e flaug
D'amor, pos ieu cresc
Sobre totz, c'als q'en fol pesc
Q'eu am des Luc tro ad Aug
La genssor, e m'en pelaug
Tot hom c'autra per fadesc
Engal'ab lieis en paresc.

Per midonz ai cor estout
Et humil e baut;
Car s'a lieis non fos d'azaut
Ieu m'estera en luoc d'un vout:
Que d'als non pensera mout
Mas manjera e tengra·m chaut
Et agra nom Raembaut.

E qui vol aprenre, escout
D'amar ben cum saut
Eu saill plus que nuills hom aut;
E·l janglos saill per so mout
Sol que s'apil e s'acout:
Cuig'ab lausenjar d'espaut
Dir so don ma dompna faut.

Ma chanssos non vuoill que saut
Mas per celz de cui m'azaut.

Per enseignamen m'azaut
De moutz qe·m fan de lur chaut.

Joglars, per qe·m desazaut
Ma dompna e vos mi faitz baut.