En aital rimeta prima
M'agradon lieu mot e prim
Bastit ses regl'e ses linha,
Pos mos volers s'i apila;
E atozat ai mon linh
Lai on ai cor qe m'apil
Per totz temps, e qi·n grondilha
No tem'auzir mon grondilh

De la falsa genz qe lima
E dech'e ditz (don quec lim)
Ez estreinh e mostr'e guinha
(so don Joi frainh e esfila),
Per q'ieu sec e pols e guinh:
Mas ieu no·m part del dreg fil,
Qar mos talenz no·s roilha,
Q'en Joi nos ferm ses roilh.

Qan vei rengat en la cima
Man vert-madur frug pel cim,
E qecs auzelletz relinha
Vas Amor, don chant'e qila,
Per cui ieu vas Joi relinh,
Don m'esforz e chant e qil;
E·l rosinhols s'estendilha
Qe'm nafra d'amor tendilh,

Si que·l cor m'art, mas no·m rima
Ren de foras, mas dinz rim;
Q'Amors l'enclav'e l'escrinha
--Si pels sans qi son part Mila--
E·l ten pres dinz son escrinh;
Q'ades am mais per un mil
Midons, si tot si·m perilha
Ni·m mou trebailh ni perilh.

Asatz m'a sauput d'escrima
Il, q'enqers vas mi s'escrim;
Mas non ha d'Aics tro a Sinha
Sa par defors ni dinz vila
E si·m destreinh ni me sinh,
Ha pro poder que·m envil;
Mas ja sos cors no frezilha
Q'a mi·l sors promes frezilh.

Don mos cors sailh fort e grima
Si q'en trep e saut e grim
E plor mais per que...
Mon cort gaug, cui acortilha
Dols, don prenc mal...
Qe·m ten trist en son cortil
Per l'amor que m'a volpilha
Midons c'a cor trop volpilh.

Qar mi ten midons tan vil,
Maldic lo jorn mil vetz cilha
Q'aduis mon cor pres de cilh.

Mas ja no m'en tengues vil,
C'anc mos cors non fon pres cilha
Mas pels cis ni sobrecilh.