En breu brizara·l temps braus
e·l biza, e·l brus e·l blancx
qui s'entresenhon trastuig
de sobre claus ram de fuelha:
qu'ar no'i chant'auzel ni piula,
m'ensenh Amors qu'ieu fassa donc
chan que non er segons ni tertz,
ans prim d'afrancar cor agre.

Amors es de pretz la claus
e de proeza us estancx
don naisson tut li bon frug,
s'es qui leialmen los cuelha,
que un delis gels ni niula,
mentre que·s noiris el bon tronc:
mas si·l romp trefas ni culvertz,
peris tro leial lo sagre.

Falhirs emendatz es laus;
e ieu senti·m n'ams los flancx
que mais n'ai d'amor ses cug
que tals qu'en parl'e·s n·orguelha,
que piegz me fa·l cor de friula;
mentr'ela·m fes semblant embronc,
mais volgr'ieu trair pen'els desertz
on anc non ac d'auzels agre.

Bona doctrina e suaus
e cors clars, suptils e francx
manda·m er al ferm condug
de leis don plus vuelh que·m cuelha,
quar, si·m fo fera escriula,
era jauzen breuja·m temps lonc,
qu'il m'es plus fina e ieu lieis sertz
que Talant e Meleagre.

Tan dopti que per non-aus
devenc soven ners e blancx;
si m'a·l sen Desirs forsdug
non sap lo cors trep o·s duelha;
mas Jois qui d'esper m'afiula
m'encolpa quar no la somonc,
per que sui del prec tan espertz
non ai d'als talan neis magre.

Pensar de liei m'es repaus,
e tragua·m ambs los huelhs crancx
s'a lieis vezer no·ls estug;
e·l cor non creatz qu'en tuelha,
quar orars ni jocx ni viula
no·m pot de lieis un travers jonc
partir...qu'ai dig? Dieu, tu m'o mertz
o·m peris el pelac agre.

Arnautz vol sos chans sia ufertz
lai on dous motz mou en agre.