Ans que sim reston de branchas
sec ni despuelhat de fuelha
farai, c'Amors m'o comanda,
breu chanson de razon lonia,
que gen m'a ducx de las artz de s'escola:
tan sai que·l cors fas restar de suberna
e mos buous es pro plus correns que lebres.

Ab razos coindas et franchas
m'a mandat qu'ieu no m'en tuelha
ni autra no serva ni·n blanda
pus tan fai qu'ab si m'aconia,
e·m ditz que flors no·il semble de viola
que·s camja leu si tot noquas iverna,
anz per s'amor sia laurs o genebres.

Ditz "Tu, qu'alhors non t'estanchas
per autra que·t denh ni·t cuelha;
totz plaitz esquiv'e desmanda
sai e lai qui que·t somonia,
que·s clama folh qui se meteis afola;
e tu no far falha don hom t'esquerna
mas apres Dieu lieis honors e celebres.

E tu c'o aus, non t'afranchas
per respieg qu'amar no·t vuelha:
sec, s'il te fui ni·t fai guanda,
que greu er qu'om no·i aponia
qui s'afortis de preiar e no cola,
qu'en passera part las palutz d'Uzerna
Mon Pelegrin lai on cor en jos Ebres."

S'ieu n'ai passatz pons ni planchas
per lieis, cujatz qu'ieu m'en duelha?
Non eu, qu'ab joi es vianda
me sap far mezina conia
baizan tenen, e·l cors, si tot si vola,
no·s part de lieis qui·l capdel'e·l governa.
Cors, on qu'ieu an, de lieis no·t luins ni·t sebres!

De part Nil entro c'a Sanchas
genser no·s vest ni·s despuelha,
e sa beatatz es tan granda
que semblaria·us messonia;
be·m vai d'Amor, que m'abrassa e m'acola,
e no·m frezis freitz ni gels ni buerna,
ni·m fai doler mals ni gota ni ni febres.

Sieus es Arnautz del sim tro en la sola
e no vuelh ges ses lieis aver Lucerna
ni·l senhoriu del renc per on cort Ebres.