Ab nou cor et ab nou talen,
ab nou saber et ab nou sen
et ab nou bel captenemen,
vuelh un nou verset comensar:
e qui mos bos nous motz enten
ben er plus nous a son viven,
que mielhs s'en deu renovelar.

Qu'ieu renovel mon ardimen
qu'ai novel ab vielh pessamen,
franc[s] de novel ab ferm parven
en chantan al novel temps clar,
que·l novels fuelhs nais don deissen
lo novels critz on jois s'empren
dels auzels qu'intron en amar.

Don amars mi fai alegrar,
que am si c'om non pot comtar
tan ben com ieu am ni pensar,
qu'ieu am la gensor ses conten:
si Dieus m'am! e no·i met cujar
qu'al mielhs d'amar la·m saup triar
Amors que nos ajustet gen.

D'Amor me dei ieu ben lauzar
mas que Amor gazardonar
non puesc[a], Amor, si·m ten car:
dat m'a Amors per son chauzimen
mas qu'Amors non pot estujar
a sos ops, Amors, ni donar
ad autrui, don ai cor rizen.

Rire dei ieu si·m fatz soven
que·l cor me ri neis en durmen
e midons ri·m tan doussamen
que ris de Dieu m'es, so·m par,
e·l sieus ris fa·m plus jauzen
que si·m rizian quatre cen
angel que·m deurian gaug far.

Gaug ai ieu tal que mil dolen
serian del mieu gaug manen
car del mieu gaug tug miei paren
viurian ab gaug ses manjar;
e qui vol gaug sai l'an queren,
qu'ieu ai tot gaug enteiramen
ab midons que·l mi pot tost dar.

Domna, d'als non ai a parlar
mas de vos, domna, que baizar
vos cug, domna, quant aug nomnar
vos, domna, que ses vestimen
e mon cor, domna, vos esgar,
c'ades mi vei, domna, estar
vostre bel nou cors covinen.

De mon nou vers vuelh totz pregar
que·l m'anon de novel chantar
a lieis qu'am senes talan var:
Dieus m'abais, e Amors, s'ieu men,
qu'autre ris me semblon plorar,
si·m ten ferm en gaug ses laissar
midons, qu'autre drut non cossen.

Ja Dieus mais domna no·m presen:
sol gart ma domna e mon Joglar.

Dieus gart ma domna e mon Joglar
e ja mais domna no·m presen.