Amors, cum er, que farai?
morrai frescs joves e sans,
enaissi dins vostras mans?
oc, murir: si·m pliu per vos,
ades mi pliu pauc mos pros;
e totz temps tan cum ieu viva,
cum que m'en an, mi pliurai.

Per qu'ieu fatz avol essai
pos aissi vos sui humans:
que fera s'ie·us fos trefans,
mals e fels et ergulhos?
fora·n plus aventuros:
oc, per que ar m'ès esquiva,
que ieu ves vos franc cor ai.

Ades mi datz plus d'esmai
on mielhs sui vas vos certans,
e fatz i ben que vilans:
quar per mal sui amoros,
mas non sai esser antos
vas vos, qu'ades recaliva
mos leus cors on piegz m'en vai.

Mas vos avetz, don morrai,
amors, l'us que Barrabans:
que·ls vostres fatz soteirans
qu'estan mal, per qu'ieu viu blos,
non faitz ges als plus iros,
mas vas aquel ès ombriva
qu'avetz en poder ses plai.

Per que si·m peza dirai,
amors, ves vos tan que cans;
ades o dic: sui aurans
de vos! qu'anc mala sai fos
nostr'aventura mest nos!
e tem dir, calacom pliva,
so que·us cofon e·us dechai.

Mas ieu o dic, e si·n brai
ni m'en desmen hom vilans,
venga armatz en us plans:
e sia orbs o gelos
s'ieu non volria esser jos
vencutz: qui·s vol so escriva!
sol vers no fos! si·m n'esglai.

Mas non es de mar en sai,
ni lai on es flums Jordans,
sarrazins ni crestians
qu'ieu non venques tres o dos;
e s'ieu dic que enoios,
ma grans dolors m'en abriva
que·m fai ver dir, e no·m plai.

E si eu fatz semblan gai
ni·m depenh coindes e vans,
si tot m'ai bos ermitans
estat et enquar ploros:
e bos hom religios
serai tot per gen celiva
totz temps, si·l cor no m'en trai.

E ma chansos, si no fos
alques ves amor esquiva,
tengra ves Rodes en lai.

Comtessa nominativa,
pros e bella ab cor verai.