Ab vergoinha part mar[r]imentz
chantarai, mas eu non pusc als,
car vergoinha deu ben aver
qui es en gran benenanza
e puis, ja per dreit ni per tort,
la pert, com que am finament[z].

Mas eu no paresc tan dolentz
com so, per que m'en ve grans mals:
mas Deus c'a midons met voler
que·m faza mala semblanza,
no·m pot mais mal far de mort,
e d'aquel eu serai jausentz.

E si d'aizo no son cre[zentz],
non pusc als: mas Dieus qu'es leials,
me don encar ogan un ver
colp de cairel o de lanza,
ho!, c'om en escut freig m'en port,
e puis er l'enveios manentz.

E qui·l[l] ditz que eu li mentz,
per que ma dona·m ten per fals,
mas sein[h]ors!, cal pro pot tener
qui zo pert [per] devinanza,
don bon amic son en descort?
et el men suau per las dentz.

Mas ples es de vilas talentz
istz lausengiers ab ditz venals,
si que un rei cuia valer
si a totz ditz en romanza
zo que·l sembla per fat deport
don camja bos cors e bos sentz.

Per que, madon', es faillimentz
qui cre tot cant au dels aitals:
e vos, s'anc m'ames jorn ni ser,
donc com fos anc en duptanza
qu'eu faillis vas vos tan de tort?
mas zo sai, que·us dol mos turmentz.

Don vau'nvers e crois eisamentz,
si que paresc fols naturals:
e farai totz tems, zo esper,
tro·m tornetz en alegranza
e·m perdonetz ses mal resort
lo tort qu'eu non ai, qu'es parventz.

E don[c] en breu ses duptanza,
per merce·m tornatz en acort
si no·us platz ma mort[z] o·l valentz!

Car me sen vas amor ses tort,
vos en prec tan ardidamentz.