Tant an ben dig del marques
joglar truant e garbier,
que tuit en son vertadier,
qu'ieu no sai que m'en disses;
pero sua es valensa,
on bons pretz nais e comensa,
e·i renovela valor
e·n fai dir vera lauzor.

E si·l reis aragones
no m'agues tout alegrier,
eu agra fin gaug entier
ab donas de Carcasses,
don m'abellis e m'agensa
lor faitz e lor captenensa,
e·lh cavalier e·lh comtor
e·lh baron e·lh valvassor.

Per so m'an Lombart conques,
pus m'appellet «car messier»
tals qu'anc non vist nulh arquier,
tan dreg ni tam prim traisses;
e·m fier al cor ses falhensa
ab un cairel de plazensa
fabregat el fuec d'amor,
temprat de dousa sabor.

E l'huelh e·l silh negr'espes
e·l nas qu'es en loc d'arbrier,
ve·us l'arc de qu'aitals colps fier
ab un esgart demanes,
dont escutz no·lh fai guerensa;
e pus a liei platz que·m vensa,
no m'o tenh a deshonor,
si·ls fortz venson li forsor.

Tant es sos bels cors cortes
e·l dig gai e plazentier,
qu'el mon non a cavallier
que vezer non la volgues;
que fag e dig e parvensa
a de Monbel e d'Argensa
e de Monrozier color
e sa cambr'es de Vallflor.

Mil tans es doblatz sos bes
que·l comtes de l'escaquier,
qu'al sieu fin pretz vertadier
no sofranh neguna res;
pus m'autreyet ses bistensa,
mas tenc que lai en Proensa,
qu'ar sai sui e mais d'onor,
e deu·s om penr'al melhor.

E si Mos Fraires saubes
qui·m rete per soudadier,
no·l tengron buejas d'acier
que vezer non la vengues.
E trobera ses falhensa
dous frug d'onrada semensa
e cort de valen senhor
ab un avinent trachor.