Sirventes non es leials
s'om no·i ausa dir los mals
dels menors e dels comunals,
e majormen dels majorals:
car ill fan los faillimenz tals
c'om non deuria parlar d'als;
e car eu·ls sai e non dic cals
mos sirventes n'er meinz cabals.

Pero·l dir me tol temors:
c'om non ausa dels majors
aissi dir verais desonors
com fai mensongieras lauzors;
per que n'es menre lor valors
car loignan los chastiadors,
e vei rics los consentidors
c'al faillir lauzan lor seignors.

Que de nos, don ve·l trobars,
degra moure·l chastiars,
que tals es vils que fora cars
si no fos lo nostre calars;
c'a nos non deu far lor donars
trop dir, ni pauc lor estancars:
c'atressi vergoingna lauzars
part razo, com a tort blasmars.

Mas er non es acuillitz
blasmars, ni lauzars grazitz,
que tantz n'a mavastatz feritz
que blasme sego·ls desgrasitz,
e lauzars vei de mainz issitz
a sels c'an lauzors enantitz;
on vei lauzadors escarnitz,
que cel n'a meinz que meillz lo ditz.

Que vout es de sus en jos:
qu'en la cort del rei n'Anfos,
c'ops de nos era fons de dos,
vesem qu'em vengut en perdos,
que rend'e dos es a garsos
d'aisso que degran dar a nos;
per que fan, donan, d'un dan dos,
c'als auls dan e tolon als bos.

Reis d'Aragon, torn m'en a vos,
car etz capz de bes e de nos.