Tot a estru

Marcabru

A la fontana del vergier, A l'alena del vent doussa Al departir del brau tempier, Al prim comens de l'ivernaill Al son desviat, chantaire, Amics Marchabrun, car digam Ans que·l terminis verdei Assatz m’es bel el temps essuig: Auias de chan com enans’e meillura Bel m’es can s’esclarzis l’onda Bel m’es cant son li frug madur Bel m’es qan li rana chanta Bel m’es quan la fueill’altana Bel m'es quan la fuelh' ufana Cortesamen vuoill comensar D’aiso laus Dieu Dirai vos e mon latin Dirai vos senes duptansa Dire vos vuoill ses doptanssa Doas cuidas ai compaignier Emperaire, per mi mezeis, Emperaire, per vostre prez En abriu, s'esclairo·il riu contra·l Pascor, Estornel, cueill ta volada; Ges l’estornels no·n s’ublida Hueymais dey esser alegrans L’autrier, a l’issuda d’abriu, Lan qan cor la doussa bisa, Lanquan fuelhon li boscatge L'autrier jost' una sebissa L'iverns vai e·l temps s'aizina Lo vers comens quan vei del fau Lo vers comenssa Mantengutz e Jois eisamens, Pax in nomine Domini! Pax in nomine Domini! Per savi·l tenc ses doptanssa Pois l’inverns d’ogan es anatz Puois la fuoilla revirola Pus la fuelha revirola Pus mos coratges s'es clarzitz Pus per un cosselh descrec Pus s’enfulleysson li verjan, Quan l'aura doussana bufa, Seigner n'Audric, Soudadier, per cui es jovens Tot a estru

Ges l'estornels no·n s'ublida
quant ac la razon auzida,
c'ans ha sa vi(d)a cuillida;
del dreg volar no s'alen[s]a,
tant anet
e volet;
e seguet
lo devet:
orguanet
e trobet;
a chantar comensa.

Sobr'una branca florida
lo francx auzels brai e crida;
tant ha sa votz esclarzida
qu'ela n'a auzit l'entensa.
L'us declui;
lai s'esdui
truesca lui.
«Auzels, fui!»
ditz. – «Per cui
fas tal brui
ho tal amortensa?»

Di l'estornels: «Part Lerida
a pros estan d'escremida,
c'anc no saup l'us de gandida:
plen a de falsa crezensa.
Mil amic
se·n fan ric;
per l'abric
que·us servic,
lo meric
del charric
n'aura ses faillensa».

«Auzels, a tort m'a envazida;
mas, pos amor no·m reisida –
mas qu'ieu no soi sa plevida –
en cug'aver m'entendensa?
L'autr'ami(e)u
son veilli(e)u
e badiu
tug d'u briu;
s'es aisiu
dam eschiu,
s'essag contenensa.

Az una part es partida
ma fin'amistatz plevida;
son joc revit si·l m'envida.
Auzels, per ta conoisensa,
so·l diguatz,
qu'en un glatz
l'eveiatz
deziratz
er l'abatz,
ans asatz
que n'aiam lezensa.

La cambra er de cel guarnida
d'un ric jauzir per jauzida,
c'ab dous baizar, ses sentida,
desotz se pla[n]t de plazensa.
Vai e·l di
qu'el mati
s'i aisi,
que sotz pi
farem fi,
sotz lui mi,
d'esta malvolensa».

Gent ha la razon fenida.
Estornels cui l'aura guida
son senhor [di]: «Conquerida
vos ai amor de valensa;
c'als mil drutz
ha rendutz
mil salutz,
e pagutz –
per c'os dutz
ses traütz –
de falsa semensa.

S'al mati
les aqui
on vos di,
eu·s mandi
qu'es ardi –
d'el jardi,
e que·us mat e·us vensa!»

Source: http://www.rialto.unina.it/