Emperaire, per mi mezeis,
sai, qan vostra proez'acreis,
no·m sui jes tarzatz del venir,
que jois vos pais e pretz vos creis
e jovens vos ten baut e freis,
qe·us fai vostra valor techir.

Pois lo fills de Dieu vos somo
qe·l vengetz del ling Farao,
ben vos en devetz esbaudir;
c'outra·ls Portz faillen li baro,
lo plus, de conduich e de do,
e ja Dieus no·ls en lais gauzir!

Mas en cels de lai es romas,
ad ops d'Espaigna e del Vas
en devetz ben l'afan sofrir,
e·ls Sarrazis tornar atras,
del aut orguoill far venir [bas],
e Dieus er ab vos al fenir.

Als Amoravis saill conortz
per las poestatz d'outra·ls Portz
q'an pres una tela ad ordir
de drap d'enveia e de tort,
e ditz cadaüs q'a sa mort
·s fara de sa part devestir.

Mas de lai n'ant blasme li ric,
c'amon lo sojorn e l'abric,
mol jazer e soau dormir,
e nos sai, segon lo prezic,
conquerrem, de Dieu, per afic
l'onor e l'aver e·l merir.

Trop s'en van entr'els cobeitan
aicill que vergoigna non an,
e·is cuion ab lauzar cobrir;
et ieu dic lor, segon semblan,
qe·l cap derrier e·ls pes denan
los coven dels palaitz issir.

Per pauc Marcabrus non trasaill
de joven, qan per aver faill,
e cel qe plus l'ama acuillir,
qan venra al derrier badaill,
en mil marcs non daria un aill,
si·l li fara la mortz pudir.

Ab la valor de Portegal
e del rei Navar atretal,
ab sol que Barsalona·is vir
ves Toleta l'emperial,
segur poirem cridar «Reial!»
e paiana gen desconfir.

Si non fosson tant gran li riu,
als Amoravis fora esqiu,
e pogram lor o ben plevir;
e s'atendon lo recaliu
de Chastella lo seignoriu,
Cordoa·ill farem magrezir!

Mas Franssa Peitau e Beiriu
aclin'a un sol seignoriu,
veign'a Dieu sai son fieu servir!

Q'ieu non sai per que princes viu,
s'a Dieu no vai son fieu servir!