Bel m'es quan la fueill'altana
el aut ra[m] branquilla
e·l rossinholet s'afana
desotz la ramilla,
que·l blacx frim e la luguana
del chant que grazilla.

Quecx auzels ques a votz sana
del cantar s'atilla,
et esforsa s'en la rana
lonc la fontainilla,
e·l chavans ab sa chavana,
s'als non pot, grondilla.

Sesta creatura vana
d'amor s'apareilla;
lor jois sec la via plana
e·l nostre bruzilla,
quar nos, qui plus pot, enguana,
per c'usquex buzilla.

Volpils lengua–traversana
qu'a lairo conseilla,
ab sa mensonia bauzana
dezert ez essilla,
per so c'amors segurana
no truep ses roïlla.

Jovens feuneia e trafana
e donar besilla;
saubud'es cauza sertana
que valors gandilla,
e malvestatz vai sobran'a
la maire e la filla.

D'azena e de bausana
moc esta quereilla –
de lonh moc e de lonh grana
sesta meravilla:
quaus es plus fera e plus cana
tro en la frondilla?

Peger es que galiana
amor qu'e gues pilla;
cruels, cozens e baiana,
calens e frezilla,
quar mol, trepej'es afana
selui cui estrilla.

Sist falsa gen crestiana
qu'en crim pec fremilla
a la fi ves Corrosana
vira l'escobilla,
que·l baptismes de Jordan a
lur notz e·ls perilla.