Dirai vos senes duptansa
d'aquest vers la comensansa
e·ls motz fan de ver semblansa:
– Escoutatz! –
qui de proeza·s balansa
semblansa fay de malvatz.

Jovens faill e franh e briza
et amors es d'aital guiza
que pus s'es al saut perpriza,
– Escoutatz! –
quascus en pren sa deviza
e pueys no sera deynhatz.

Fams ni mortaldaz ni guerra
no fai tan de mal en terra
quon amors qu'ab enguan serra;
– Escoutaz! –
quan vos veira en la bera
no·n sera sos huelhs mulhatz.

Dirai vos d'amor cum sinha:
de sai guarda, de lai guinha,
sai baiza e lay rechinha.
– Escoutatz! –
Plus sera dretta qe ligna
cant eu serai sos privatz.

Amors solia esser drecha,
mas aras es torta e brecha,
et a culhida tal flecha
– Escoutatz! –
que lay on no mort ylh lecha
pus aspramens no fai chatz.

Non ai cura d'amor finha
que plus fort si pren que tinha
e croys quon el fuec la pinha.
– Escoutatz! –
Totz sos esclaus esfrondilha,
qui no·l sec sas voluntatz.

Amors es mot de fer avi;
mil homes a mortz ses glavi;
anc Dieus no fes tal gramavi
– Escoutatz! –
que tot nesci del pus savi
no·n fassa si·l ten al latz.

Selh'amor viu de rapina,
que per un sol non defina;
non es amors qu'ans tahina,
– Escoutatz! –
e quer la grossa meizina
per que·l cons es derramatz.

Ab diables pren barata
qui fals'amor acoata;
no·l cal qu'autra vergua·l bata;
– Escoutatz! –
plus non sent que selh qui·s grata
tro que s'es vius escorjatz.

Amors qui ves dos s'aclina
quer lo ters que·l plec l'esquina;
plus es puta que maustina
– Escoutatz! –
q'ab lo lop s'acoatina
don eys linhatges mesclatz.

Amors es tan vaira-pigua
qu'ab semblant de ver noyrigua
totz selhs que cuelh en sa higua.
– Escoutatz! –
Ab tan greu las los estrigua
que greu n'es hom destacatz.

Amors a usatge d'egua
que tot jorn vol qu'om la segua,
e ditz que no·l dara tregua
– Escoutatz! –
mas que pueg de legu'en legua,
sia dejus o disnatz.

Cuiatz vos qu'ieu non conosca
d'amor si's orba o losca?
Sos digz aplana e tosca;
– Escoutatz! –
plus suau ponh q'una mosca
mas pus greu n'es hom sanatz.

Amors es ardida cauza;
entrebresca cada pauza,
– Escoutatz! –
plena d'erguelh e de nauza.
Qui la mante non repauza
plus que selh que gieta datz.

Amors es cum la beluga
que coa·l fuec en la suga:
art lo fust e la festuga;
– Escoutatz! –
pueys no sap en qual part fuga
selh qui del fuec es guastatz.

Brus Marcs, lo filh Marcabruna,
fon engenratz en tal luna
que sap d'amor quon degruna,
– Escoutatz! –
per o anc non amet una,
ni d'autra non fo amatz.

Amors es d'aita[l] figura
non siec razon ni mezura;
quar selh qui crup en l'escura
– Escoutatz! –
fai querre leu clavadura
si l'es tai plus aizinatz.

Enquer jatz bec-de-tartugua,
buffa-fuec, salier-issugua!
Lo con soven si effugua
– Escoutatz! –
ab tal vieg sembla verrugua
tro que sia arressatz.

Tan fort es enverinada
l'amor qu'es de lai raubada
o·l cuia far car[t]airada
– Escoutatz! –
tost mostra al folh l'estrada
quan lo granier es voiatz.

Aitant quant l'avers li dura
met coart en l'ambladura,
pueys li ditz tal desmezura:
– Escoutatz! –
«Lo tieu diest e·l mieu endura»,
e «Siec los autres malvatz».

Per dreg si franh la maissella
qui per son vol a ssupella
e·s met en aital tenselha;
– Escoutatz! –
que meynhs val q'una mezella
ni elha ni son solatz.

Qui per sen de femna renha,
dregz es que mal li·n avenha,
si cum la letra·ns essenha.
– Escoutatz! –
Mala ventura vos venha
si totz no vos en guardatz!

Anc pueys amors no fon vera
pus triet del mel la cera;
ans sap si parar la pera
– Escoutatz! –
..............