Un sirventes m’aduz tan vil razos,

Lanfranc Cigala

Car es tant conoissenz, vos voil, E mon fin cor regna tan fin’amors, En chantar d’aquest segle fals Entre mon cor e me e mon saber Escur prim chantar e sotil Estier mon grat mi fan dir vilanatge Estier mon grat mi ven dir vilanagie Eu non chant ges per talan de chantar; Ges eu non vei com hom guidar si deia, Ges non sui forzaç q’eu chan, Gloriosa sainta Maria, Hom qe de domna se fegna Ioios d’amor farai de ioi senblan, Lantelm, qui·us onra ni·us acuoill N’Anric, no m’agrada ni·m platz Non sai si·m chant, pero eu n’ai voler; Oi, Maire, filla de Dieu Pensius de cor e marritz Per o car vos fegnetz de sotilment entendre, Quan vei far bon fag plazentier, Quant en bon luec fai flors bona semenza, Raimon robin, eu vei que Dieus comenza Seigne’n Thomas, tan mi plai Si mos chanz fos de ioi ni de solatz Tan franc cors de dompn’ai trobat Un avinen ris vi l’autrier Un sirventes m’aduz tan vil razos,

En chantar d'aquest segle fals
ai tant'obra perduda,
dont tem aver penas mortals,
si merces no m'aiuda.
Per que mos chans si muda,
e·l vueill ofrir
lai don venir
mi pot complid'aiuda;
sol no·m si'irascuda
la Maire Dieu,
cui mos chantars saluda.

Pero, si garda mos peccatz,
ben deu esser irada;
mas sa grant merce prec, si·l platz,
la mi fass'apagada.
Aitals merces m'agrada,
quar es secors
dels peccadors,
cui es razos loniada.
Sia·m merces donada,
Maire de Dieu,
quar per merce fust nada.

Qu'anz que·l vostre bels cors ioios
nasques, era establida
morz a chascun qu'el segle fos,
quar l'avia merida
Eva, tant fon ardida,
quar tenc a leu
lo dig de Dieu:
de que fon pois aunida.
Mais pois en vostra guida,
Maire de Dieu,
em trag de mort a vida.

Per Eva e per son peccat
era tota genz morta;
mas per vostra vergenitat
n'es uberta la porta.
Eva per via torta
nos aduis mort,
e vos conort,
don la gens es estorta.
Tal frug vostr'albres porta,
Maire de Dieu,
que vida nos aporta.

Ev'autreiet, quar li fon bel,
al diable bauzia,
e vos a l'angel Gabriel
la vera profecia.
Eva ac nom l'enemia;
el contradig,
segon l'escrig,
ditz hom: «ave» Maria.
Tot so qu'Eva desvia,
Maire de Dieu,
«ave» torn'en la via.

Per qu'eu vos lau e·us dei lauzar
gloriosa Reina,
que chascunz nafratz pot trobar
en vos vera mezina,
quar vostra merces fina
chascun que·s vol
garis de dol,
de mal e de ruina,
si de cor vos aclina,
Maire de Dieu,
qu'als bos precs es vezina.

Ara vos prec e·us clam merce
que no·m siatz loindana,
qu'ieu sent nafrat mon cor e me
e ma voluntat vana
de folli'e d'uffana,
per qu'eu vos quier
conseill entier
et aiuda certana.
Sia·m merces prosmana,
Maire de Dieu,
don m'arma sia sana.

Quar si tot ai d'obra faillit,
crezens'ai dreit'asiza:
Paire, Fil e Saint Esperit
crei un Dieu, ses diviza;
la charn, qu'en crotz fon miza,
pres Dieus de vos
per salvar nos,
e per so fon auciza;
e qi cre d'autra guiza,
Maire de Dieu,
sai ben qe·l col se briza.

E crei que fos enant lo part
et apres ses faillenssa
vergena, ques anc no i ac part
hom ni carnals semensa:
e·l ver salm que comensa
«Credo» crei tot
de mot en mot;
d'alre·m faitz doncs valensa,
quar de falsa crezensa,
Maire de Dieu,
no m'a obs penedenssa.

Pero, Domna, quar miels sabes
so que·m fai sofraichura,
de so qu'obs m'es mi secorrez
tant quant vida mi dura,
qu'eu faz'obra tant pura,
que paradis
aia conquis
cant er la noiz escura.
Be sai que·m noz drechura,
Maire de Deu,
mais merces m'asegura.

Source: http://www.rialto.unina.it/