Pensius de cor e marritz
cobleiarai, car mi platz,
e non voill esser blasmatz
si mos chanz non es grazitz
tant qom s'ieu era alegranz,
c'anc iocs ni solatz ni chanz
ses alegrer non agron lur saizon;
mas chantar voill, vailla mos chanz o non.

Pero s'ieu tot sui marritz,
qan eu sui pro apensatz,
meravillas vei assatz;
mas d'una·m sui esbaitz,
don sui trop meravillanz
car passa totas las granz,
coissi pot far mesfaig ni faillizon
hom qui de mort non cuid'aver perdon.

Mas chascus, don sui marritz,
stai de mort asseguratz,
e sap que non er mudatz
que chascuns er sepellitz;
mas qui non laissa·ls enianz
sembla q'en sia doptanz,
car qui tailla de sa mort lo baston
non cre morir o sabers no·ill ten pron.

Mas de mi sui plus marritz,
meravillos et iraz,
car zo qu'eu plus repren fatz
vas Dieu, qui mortz e traitz
fon per nos gardar dels danz
e dels enfernals affanz;
mas s'ai faillit, eu li prec que·m perdon
e farai li chantan confession.

Qu'eu ai faig, don sui marritz,
los set criminals peccatz,
de que m'enoi'e·m desplatz,
e dels faillimenz petitz
tanz qu'eu no·n sui remembranz;
per qu'e·us acli sopleianz,
Dieus, qui en crotz perdonest a un laron,
que·m perdonetz e no·i gardetz razon.

Pero non sui tant marritz
qu'eu sia desesperaz,
quar ai vist dels plus nafratz
per vostra merce gueritz;
per que·us requier merceianz
quar dreitz vol mos dezenanz;
e doncs merces m'aiut qu'eu la somon,
e dreg soan qu'a mon obs no·l teing bon.

Maire de Dieu, totz mos anz
mi faitz far vostres comanz,
qu'aissi serai certz de salvaçion,
per qu'e·us en prec con cel que vostr'om son.