Guirautz, don'ap beutatz granda
tota sola jatz
en un lieg, e selh que·l platz
jatz n'en autre ses demanda
que l'us a l'autre no fay,
et amo·s de cor verai:
si·l cavaiers se leu ab lieys jazer,
o ilh ab luy, cal li deu mai plazer?

S'ieu laissava per pueg landa
semblaria fatz,
Folquetz, e soy m'acordatz,
pus entr'els amors s'abranda
e demans no si eschai,
c'al aiman deu plazer may
qu'elh an vas lieys, et ela que·l n'esper,
que s'ilh a luy vay ses s'amor querer.

En Guiraut, dretz es que blanda
la dona l'amatz
amicx; pero pus assatz
li deu plazer, s'Amor manda
la dona, que se·n a‹n› lay
o sos fis amans se jay;
car Amors pren en totas res poder,
non la·n deu hom blasmar si·l vay vezer.

Folquetz, fin'amors comanda
c'amans afinatz,
pus s'es a don'autreyatz,
li port tot onor sens ganda;
et yeu que conosc e say
que non tanh fassa qu'il play
ela, ni el non o deu pas voler,
ans seretz vos blasmatz del mantener.

En Guiraut, de temor branda
·l fis enamoratz,
que non auza far sos gratz
tant que s'an colcar arranda
de sidons; e s'ilh mal trai
per s'amor, s'ela s'en vay
al cavayer no fay so non-dever,
pus que conoys qu'ilh n'estay per temer.

Vostra razos es truanda,
Folquetz, car mandatz
temer l'aman, pus l'es datz
locx on sos jauzirs s'espanda;
sembla que del joy s'esmay,
e dizetz, de que·m desplay,
que·l dona·s va·n a luy per son dever:
vos et ilh duy devetz vergonh'aver.

Be[ls] senhers, c'a pretz veray,
de Canpendut, s'a luy play,
jutg', en Guiraut, si deu melhor saber
al cavayer s'il vay sidons vezer.

Folquetz, son dig ne vuelh may
que d'autre, car bon dreg vay,
qu'el sap d'amors e d'als far son dever,
e sabra·n grat et honor conquerer.