Auzir cugei lo chant e·l crit e·l glat
que fan l'auzel qan son vert li plaissat:
aital fer'eu, mas, per sa voluntat,
ma domna·m dis c'ar de lleis cambiat
quar anc creziei moiller de son vezin.
Ia Dieus non sal don Rainier l'afillat
s'anc l'en menti pos fui en s'amistat!
Enanz l'am mais que peis en romanin.

Seingner, son nas volri'agues taillat
qui vos a dig que·us aia enantat!
C'aissi fos solta e monda de peccat,
con sui de cel de cui es azalbat!
Sitot port arc e coutel barbarin,
pens e repens, e tant non ai pensat,
puesca saber d'on si'espermentat,
mas sap autan color de sarrazin!

Domna, tostemps vos aurai castiat
non disseses follia ni viutat!
Aquest es rica e de gran parentat
et a marit bon vassaill estrunat,
qu'eu li ai vist caval outramarin,
et es saubut en feir'o en mercat:
genser de lleis non debana filat,
e met vos i Cavelc e Venassin!

Seingner, per Dieu, ben ai mon cor irat
quar a·l sieu ling contra·l mieu azemat,
qu'eu sui plus rica e de maior barnat
et ai trop mais de lan o de filat
e pois ai bon cavallier a pairin.
E no·us tengatz ges a regastenat,
qu'e·us ai cubert en lansol bugadat
que era totz ces estantier de llin!

Domna, ben sai que·us er guizardonat
que n'o es mes en bassac pertuzat!
Si mlgoires m'aguesson aiudat,
espeil n'agras e bon correi pinsat
e quabeillier ab que·us tengues sa crin;
pois disseran tuit li plus envezat:
«Cals es aquist?». Quant vos vengras d'orat!
Ben vos plevisc, bella: m'est sobrefin!

Seingner, tostemps ai dig e mon orat
que venguesses quant er'escudelat
qu'eu er'ensencha, c'avia encargat!
Quant enpugiei sus el bari merlat
et en qazic malut'e n coisin,
eu conuc ben con n'avias peccat
e fui dolent'ab vos; per amistat,
aqui mezeis, fis vos en bona fin.

Domna, ben fon saubut et açalbat
lo luns matin com fes la caritat
quant portest guans e borsa de sendat:
a las meillors aguest lor pretz baissat,
que tot un iorn n'esteron a latin.
Si fossetz lai on vos fon destinat,
foratz al bois, part Sancta Trinitat,
al port de Sorc, en terra de Sanguin.