Ieu no suy pars als autres trobadors,
ans suy trop durs a selh que·m ten per fraire;
e mos trobars es blasmes e lauzors:
enueitz plazers fas als savis retraire
et als nescis dir quo suy quetz;
per que mos vers deu mais valer,
qu'entre mil non cug n'aya detz
que del tot puescon retener
so que mos sens ampara.

Mos sens es clars als bos entendedors,
trop es escurs a selh que no sap gaire;
per que cujars, lai on no val valors,
non es sabers ni sens, a mo vejaire,
qu'ieu vey e sey selhs qu'entendetz.
Quecx cujatz bon'amig'aver,
sol so qu'en veyretz ne crezetz
que cujars fa·l savi cazer
si sens non lo declara.

Jamais no·m gars, si aras no·m secors
sens ni agurs, del crim don aug lo braire.
Aigua, ni mars, ni fuecs, non es paors,
ni reteners laironessis al laire,
contra·ls engans fenhs e cubertz
de las falsas, fenchas, ses ver,
qu'ades porto·ls lasses ubertz
ab que·ns prendon mati e ser,
e·l jorn, q'us no s'en gara.

Larcx et avars, los pus autz e·ls menors
vey mal segurs d'amor, don son amaire,
quar sos mesclars es de motas colors;
cubertz tenhers, don ja us non repaire
fa als pus parliers et als quetz,
tro n'a avut a son lezer
so que no vuelh e que voletz.
Del belh semblan que·n fe parer
non es pueys trop avara?

Pauc val amars cuy escompren amors,
ni sos aturs, ni l'honor de son paire;
desheretars es conortz e sabors,
tro·l falh l'avers que s'en cuja estraire.
Ben gieta en mar e·ls dezertz
sa semensa – don frug no'sper –
lo pus cortes e·l mielhs apertz,
quan lo torna e noncaler
fals'amistatz amara.

Vils es e cars e muda trops senhors
lo cons tafurs, deslials enganaire.
Anc lunhs azars ab datz galiadors
ni lunhs poders no saup tan d'aver traire,
quo fa aquelh per cuy falh pretz,
qui cre lieys que l'a en poder.
Amors, per que vos no vezetz
l'engan qu'elhas nos fan vezer
quan s'an pencha lur cara?

No·m dezampars joys de totz los melhors,
que·l pus autz murs pert son pretz ab un caire.
Quar dompneyars falh als fis amadors,
pauc val temers, que mais n'a us trichaire.
Donas, per semblan, tort n'avetz:
lonc temps a degra remaner
la foldatz que vos mantenetz,
que·ls pus ricx faitz per folhs tener,
quar joys los dezampara.

Jois et amors, per que fugetz
aselh en cuy deuratz caber?
May amatz aver, so dizetz,
que Espanhols no fa comer,
ni Abraam no fe Sara.

Drutz e maritz ben conoyssetz
................
sie·us ditz so que vos no sabetz
ja no li·n devetz pietz voler:
tart o sabretz sempr'ara!