Per Dieu, Amors, ben sabetz veramen
c'on plus deisen plus poja Humilitatz
et Orgoills chai on plus aut es pojatz;
don dei aver gauch e vos espaven
qu'ancse·m mostres orgoill contra mesura
e brau respos a mas humils chansos:
per qu'es semblanz que l'Orgoills chaia jos,
c'apres bel jorn ai vist far nueg escura.

Mas vos no par poscatz far faillimen;
pero, can faill cel qu'es pros ni prezatz,
tan com val mais tan n'es plus encolpatz,
qu'en la valor poja·l colpa e deisen;
e quant hom tot perdona·l forfaitura
ja del blasme no·ill sera fatz perdos,
c'aicel reman en mala sospeisos
qu'a manz met cel qui vas un desmesura.

Blasme n'a hom, e chascus cela s'en,
per que n'es plus en l'engan galiatz
aicel que·l fai c'aisel qu'es enganatz;
e vos, Amors, per que·l fatz tan soven
c'on plus vos serv chascus plus s'en rancura?
E de servir taing qualque guiardos,
pretz o amics, meilluramenz o dos:
menz d'un d'aquestz par fols qui s'i atura.

Ben fui eu fols, que·i mis lo cor e·l sen:
senz no fo ges, enans fo granz foudatz,
car sel es fols qui cuj'esser senatz
e sap hom menz ades on plus apren;
e, pois Merces que val mais que Dreitura
non valc a mi ni ac poder en vos,
pauc mi sembla m'agues valgut Rasos;
per qu'eu fui fols car anc de vos ac cura.

Mas ar sui rics, car en vos no m'enten,
qu'en cujar es riquesa e paubertatz,
car sel es rics qui s'en ten per pagatz
e sel paubres qu'en trop ricor enten;
per qu'eu sui rics: tan grans jois m'asegura
quan pes qu'eu sui tornatz desamoros,
c'adoncs era marritz, ar sui joios;
per qu'eu m'o tenc a gran bonaventura.

Cortesia non es als mas mesura,
mas vos, Amors, non saubes anc que·s fos;
per qu'eu serai tan plus cortes de vos
c'al major briu calarai ma rancura.

A N'Aziman et a·N Totztemps t'atura,
chansos, car lor es e de lor rasos,
c'aitressi s'es cascus pauc amoros,
mais semblan fan de so don non an cura.