Quan Beutatz me fetz de primier
en la forsa d'amor intrar,
cugera, si·m volgues forsar
mon cor, que·m gites de pessier :
si midons, que no m'aonda,
ni·l plai que m'esgar ni·m responda,
me laysses – tan cum fai – languir,
yeu·m cugera d'amor partir.

E pren m'en cum al marinier,
quant s'es empenhs en auta mar
per esperansa de trobar
lo temps que mais dezir'e quier,
e quant es en mar prionda
mal‹s› temps e braus la nau sobronda,
tant qu'al perilh non pot gandir,
ni pot remaner ni fugir.

Atressi, per mon sen leugier,
suy ieu intratz en aut amar
per esperansa de joy car
aver del gay cors plazentier
de midons, qu'es bell'e blonda
e de totz mals ayps cast'e munda,
sal d'aitan qu'om non pot yssir
de brau amar, que lieys remir.

Per lieys, tan n'ai gran dezirier,
suy remazutz el major far
d'amor, e no·m puesc governar
mas ab govern de cossirier
qu'ai tan gran qu'ieu cre·m cofonda,
tan dezir la plus jauzionda
del mon qu'es la genser que·s mir,
segon qu'om pot ni sap chauzir.

Vermella cum flor de rozier
a sa color, ses gienh e var
son vis ab que sap esgardar
tan prim que·l cor, ans que·l cors, fier,
don nays amors dezironda,
e non a voler que s'esconda
al colp selh que·l pren, quar ferir
sap tan gen qu'om no·n vol guerir.

Reys Jacmes, tan vos aonda
fis pretz que·us fai ab valor munda
a Dieu et a segle grazir,
tans plazers sabetz far e dir.

Coms de Rodes, qui qu'en gronda,
cort tenetz bon'e jauzionda,
e ma Genser·s tem tan fallir
qu'ab me noy·s vol esdevenir.