Per amor e per solatz
e per fin joy mantener,
e per far a lieys plazer,
si puesc, de cuy so donatz,
fas chansoneta leugeira,
e quar suy de tal maneira
que nuech ni jorn la fin'amor‹s› no·m gic
qu'ieu port a lieys que d'amar m'afortic.

E si tot s'es brugz levatz
que ditz qu'ers non pot valer
chanso qu'om fassa, ges per
aquo fis enamoratz,
pus es ben en la carreyra
d'amor, non tanh que sofeyra
de far chanso –si sap–, si tot l'antic
doctor feyron chans qu'om mais lor grazic.

Mas ja, per otracujatz
reprendedors, retener
no volrai mon car saber
que no sia prezentatz
quan levaran en cadeyra,
per fina valor enteira,
lo pro comte de Rodes, n'Aenric,
per cuy anc hom, luy lauzan, no mentic.

Mas er es us temps qu'assatz
trob'om qui ditz mal saber
et enuetz e nondever
a quascus de so que·l platz,
e qui chanso vertadeira
fai de razon drechureira
non l'es grazit tan cum son crit mendic,
don joys e chans e pretz prendon destric.

E non deu esser blasmatz
qui lauza so don ditz ver,
ans li·n deu hom grat saber
quan lauza so qu'es vertatz;
mas qui lauzor ufaneira
fa de razon messongeira
be lo·n deu hom blasmar e far enic,
non per midons lauzar, qu'anc no falhic.

Si de la villassa neyra,
qu'espaventalh de faveyra
sembla, ·s layssa nostre coms, tug em ric,
e de maldir de ma Gensor se gic.

Na Biatritz a maneira,
de Lunelh, tan plazenteira
que tug aquilh son siey coral amic,
que la vezon, tan gen Dieus la complic.