No pot aver sen natural
selh que non a retenensa
sobre sa ira de far mal,
que·l savis fai per sufrensa
semblar de son gran tort gran dreg,
e·l fol de son bon dreg naleg,
quan malamens, outra mezura,
vol trop demandar sa drechura.

Per me·us o dic qu'amor lial
port a midons ses fallensa,
si tot a lieys de mi no·l cal
ni·m mostr'en re bevolensa;
ges per tan yraisser no·m deg,
e pus amors li m'a eleg,
merces, en cuy mos cors s'atura,
metra·s en lieys per aventura.

Res no monta ni res no val
pus hom a, lay on l'agensa,
meza sa fin'amor coral;
si tot fai long'atendensa
‹no›·s n'irasca ni·s ne maleg,
ni que·l ne trop hom desadreg,
que ben leu, si tot l'es escura,
sidons li port'amor segura.

Donas hi a qu'ab venassal
semblan porton bevolensa,
que non auzan traire venal
lor amor ni lor parvensa
tro qu'an proat si de bon pleg
son be, e d'amor el destreg,
selhs en cuy volon, ses falsura,
metre lur amor e lur cura.

Qui vol amar dona cabal
pus a bona captenensa,
ges non la deu gardar engal
si meteys; de far fallensa
mas d'us folhs fenhedors hi veg,
qu'amor non an ni fe ni leg,
que manta dona cast'e pura
fan encolpar ses forfachura.

Del pro comte de Rodes deg
ben dir e vuelh et ay ne dreg,
quar valors e pretz e drechura
son en luy, e sens e mezura.
A Lunelh remanc e m'espleg
ab senhor lial et adreg,
e quar ma Genser s'asegura
valor, mos chans d'est vers melhura