Dompna, bona, bel'e plazens,
per vos fis joys envers me nays
ins e mon cor, quan pes qu'esmais
avetz de nostres falhimens;
Maires de Dieu, verges e cast'e pia,
mans peccadors e mantas peccairis
attendon joy que luns temps no fallis
per vostres precx, sancta Verges Maria.

Dompna, Vos etz razonamens
de nostras armas ab Dieu mais
que res que sia, qu'els esglays
non caio d'ifernals turmens;
e Vos etz flors e frug don se... gria
la pia............. pandis
en....... a nostras fi[s]
[per vostres precx] sancta Ver[ges Maria].

Dompna...
de salvatio...
... nasquet lo...
... re de fern...
... ga de bon...
... nen vos q...
que las portas a peccadors ubris
per vostres precx, sancta Verges Maria.

Dompna, quan fo le nayssemens
del vostre car filh, res no·us frays
plus que franh la veiria·l rays
del sollelh qu'es dins resplandens,
per qu'es folhs selh qu'a Vos non s'umilia,
que·l plus belh frug e·l plus noble noyris
qu'anc fos, per que mant'arma reculhis
per vostres precx, sancta Verges Maria.

Ar preguem Selh que·ls elemens
formet e tot quant es, que·ns lays
descargar quasqus del greu fays
qu'es de las armas perdemens,
que tant em ple d'erguelh e de bauzia,
que·l mon‹s› fora ben dignes qu'en peris,
Maire de Dieu, s'El tan non obezis
vostres cars precx, sancta Verges Maria.

Vostra valor, Dona, dir non poiria
luns homs carnals, tant es vostre pretz fis
.....................
sal Dieus o Vos, sancta Verges Maria.

Al mieu senhor, qu'es coms de Rodes, via
tie·y ma chansos, on fis pretz se noyris,
e digas li·s peneda si mal dis
de ma Gensor, qu'es la Verges Maria.