Tuih cil que·m preyon qu'eu chan,

Bernart de Ventadorn

A tantas bonas chansos Ab joi mou lo vers e·l comens Ab joi mou lo vers e·l comens, Amics Bernartz de Ventadorn, Amors, enquera.us preyara Anc no gardei sazo ni mes Ara no vei luzir solelh, Be m'an perdut lai enves Ventadorn Be·m cuidei de chantar sofrir Bel m'es can eu vei la brolha Bel m'es qu'eu chan en aquel mes Bernart de Ventadorn, del chan Can la freid' aura venta Can la verz folha s'espan Can l'erba fresch'e·lh folha par Can lo boschatges es floritz Can lo boschatges es floritz Can lo dous temps comensa Can par la flors josta·l vert folh Can vei la flor, l'erba vert e la folha Can vei la lauzeta mover Chantars no pot gaire valer, Conortz, era sai eu be E mainh genh se volv e's vira En cossirer et en esmai Era·m cosselhatz, senhor, Estat ai com om esperdutz Gent estera que chantes, Ges de chantar no·m pren talans, Ja mos chantars no m'er onors La dousa votz ai auzida Lancan folhon bosc e jarric, Lancan folhon bosc e jarric, Lancan vei la folha Lancan vei per mei la landa Lo gens tems de pascor Lo rossinhols s'esbaudeya Lo tems vai e ven e vire Lonc tems a qu'eu no chantei mai Non es meravelha s'eu chan Peirol, com avetz tan estat Pel doutz chan que·l rossinhols fai, Per melhs cobrir lo mal pes e·l cossire Pois preyatz me, senhor , Tant ai mo cor ple de joya, Trobatz mais fol mas can me Tuih cil que·m preyon qu'eu chan,

Can lo boschatges es floritz
e vei lo tems renovelar
e chascus auzels quer sa par
e·l rossinhols fai chans e critz,
d'un gran joi me creis tals oblitz
que ves re mais no·m posc virar.
noih e jorn me fai sospirar,
si·m lassa del cor la razitz.

Per midons m'esjau no-jauzitz,
don m'es l'afans greus a portar,
qu'e·m perdrai per leis gazanhar,
et er li crims mout deschauzitz.
las! que farai? com sui träitz,
si s'amor no·m vol autreyar!
qu'eu no posc viure ses amar,
que d'amor sui engenöitz.

Ar sui de leis trop eissernitz!
lenga, per que potz tan parlar?
que de menhs me sol acuzar
sí que·m sui per las dens feritz.
que·m n'es si fer s'eu sui delitz?
ja no trobará, li m'ampar;
mas ab doutz sentir d'un baizar
for'eu tost d'est mal resperitz!

En greu pantais sui feblezitz
per leis cui Beutatz volc formar,
que com Natura poc triar,
del melhs es sos cors establitz:
los flancs grailes et escafitz,
sa fatz frescha com roza par,
don me pot leu mort revivar.
dirai com? no sui tan arditz.

De tal dousor sui replenitz,
can de prop la posc remirar,
c'a totz jorns vei lo meu sobrar,
ta fort sui de s'amor techitz;
e·l freis es tals, qu'e·n sui marritz,
can la vei de me deslonhar,
que·l focs que m'en sol eschalfar,
fug, e remanh escoloritz.

Lo bes e·l mals sia·lh grazitz,
pos de me denha sol preyar.-
ara folei de trop gabar
et es dreihs qu'en fos desmentitz!
domna, no·us pes si·lh lenga ditz
so c'anc mos cors no poc pessar,
tatz, bocha! nems potz lengueyar
et es t'en grans mals aramitz.

Autz es lo pretz qu'es cossentitz,
car sol me denhet saludar.
moutas merces! Deus la·n ampar!-
del plazer me sui engrevitz.
totz l'autre bes m'es si frezitz
que no·m valgra·n merce clamar.
clama·l cors que no pot cessar;
et apres m'es parlars falhitz.

Domna, s'eu fos de vos auzitz
si charamen com volh mostrar,
al prim de nostr'enamorar
feiram chambis dels esperitz!
azautz sens m'i fora cobitz,
c'adonc saubr'eu lo vostr'afar
e vos lo meu, tot par a par,
e foram de dos cors unitz!

Ai! can brus sui, mal escharnitz!
qu'eu no posc la pena durar,
de tal dolor me fai pasmar,
car tan s'amistat m'esconditz!
ab bel semblan sui eu träitz.
que·m val? res no·m pot chastiar!
mortz venh'a sel qui·m vol blasmar
qu'eu no l'am mortz e sebelitz!

Car forsatz m'en part e marritz,
leu m'auci, mas greu fui noiritz,
tal ira·m sen al cor trenchar,
car me mor e volh trespassar,
mas ses leis no serai gueritz!

Source: http://www.rialto.unina.it/