D'entier vers far ieu non pes
ni ges de fragz no·n faria
e si fatz vers tota via,
en l'an un o dos o tres,
et on plus sion asses,
entier ni frag no so mia.

Aisso non creyrey ieu ges
que lunhs vers de leujairia,
don creys peccatz e follia,
per dreg nom entier agues
............
qu'entier denant non faria.

E so quez entier non es
ni anc no fo, cum poiria?
Fols hom leu so cujaria
que chans nulhs entrebesques
qu'om de vanetat fezes:
entiers ni fragz non seria.

Foudat fai e nescies
qui vers fai de truandia,
pessan qu'entiers ni fragz sia:
que chanso ni sirventes
n'estribot ni arlotes
non es, mas quan licharia.

Selh qui faulas di – faul'es
enteiramen lecharia
si qu'om no c'enganaria –
qu'entiers e sals remazes
non pot, que sa falsa fes
lo ten fat en s'aurania.

E quan canorgues si mes
Pey d'Alvernh'en canongia,
a Dieu per que·s prometia
entiers que pueys si fraysses?
Quar si feys fols joglar es
per que l'entier pretz cambia.

E cujas qu'a Dieu non pes
chans d'aital ufanaria,
e doncx quo mals li plairia?
Mas no·l play, que, si·l plagues,
tant auria·l mals conques
qu'ab ben egal partiria.

Si peccatz era merces,
messonja vertatz parria,
e qui en sa joglaria
ment, e mentir non es bes,
donc es mals, e non es res
mas despieigz e vilania.

Fols vanars es pagezes
e grans laus es pagezia
e fols mentirs es bauzia
et hom de dit ufanes
es plus vilas que pages,
segon romans e clercia.

E selh no par ges cortes
qui·s lauza ni·s glorifia,
quar eys Dieus nos anuncia:
«Qui trop s'yssaussa, mens es
bayssan, e selh levatz es
qui segon so s'umilia».

So dis qu'om si conogues,
e qui aisso gardaria
ja no·s sobrelauzaria,
que sobrelaus follesc es
e pareys be, si pros es,
ja el mezeis non o dia.

Pro sap e ben es apres
qui so fay que ben estia,
et es mager cortezia
que sos laus es pels paes
per autruy que per el mes,
qu'ab pobol par vilania.

De far sos novelhs e fres
so es bella maestria
e qui belhs motz lassa e lia
de belh art s'es entremes;
mas non cove q'us disses
que de totz n'a senhoria.

En pauc d'or'es hom mespres
quan ditz mais que non deuria.